साप्ताहिक राशिभविष्य : (२५ ऑगस्ट २०२४ ते ३१ ऑगस्ट २०२४)

नवकल्पनांना वाव मिळणार

मेष : सप्ताह अश्विनी नक्षत्राच्या व्यक्तींना खरेदी-विक्रीच्या व्यवहारातून जपण्याचा. शंकास्पद व्यवहार टाळाच. बाकी सप्ताह कलाकारांच्या नवकल्पनांना वाव देणाराच. सप्ताहाची सुरुवात नव्या ओळखी करून देणारी. भरणी नक्षत्राच्या व्यक्तींना ता. २७ ते २९ हे दिवस अतिशय प्रवाही राहतील. व्यावसायिक वसुली होईल. कृत्तिका नक्षत्राच्या व्यक्तींना सरकारी कामात यश.

मित्रमंडळींकडून लाभ होईल

वृषभ : कृत्तिका नक्षत्राच्या व्यक्तींच्या आयुष्यात या सप्ताहात शुक्राचं राश्यांतर मोठे चमत्कार घडवेल. काहींना मित्रमंडळींकडून लाभ. ता. २६ ते २८ हे दिवस मोठा गोपाळकाला साजरा करणारे. मृग नक्षत्राच्या व्यक्तींना मोठ्या सुवार्ता धन्य करतील. रोहिणी नक्षत्राच्या व्यक्तींना ता. २९ व ३० हे दिवस आध्यात्मिक प्रचितीचे. एखादा नवस पूर्ण होईल.

वादग्रस्त येणं वसूल कराल

मिथुन : मृग नक्षत्राच्या व्यक्तींना शुक्रभ्रमणाचं एक ग्रहयोगांतर्गत पॅकेज राहील. घरात उंची खरेदी होईल. घरातील तरुणांची कार्ये ठरतील. आर्द्रा नक्षत्राच्या व्यक्तींना ता. २८ व २९ हे दिवस व्यावसायिक तेजी ठेवतील. एखादं वादग्रस्त येणं वसूल कराल. पुनर्वसु नक्षत्राच्या व्यक्तींना ता. २९ चा अजा एकादशीचा गुरुवार एखादा मानसन्मान घडवेल. काहींना सज्जनांचा सहवास लाभेल.

असंगाशी संग टाळावा

कर्क : सप्ताहाची सुरुवात आणि शेवट मोठा प्रसन्न राहील. तरुणांच्या नोकरीविषयक मुलाखती छान संकेत देतील. शुक्र हर्षल शुभयोगाचं पॅकेज पुनर्वसु नक्षत्राच्या व्यक्तींना चांगलंच अंमल करेल. प्रेमप्रकरणं मार्गी लागतील. उद्याची श्रीकृष्ण जयंती मोठी भावरम्य राहील. पुष्य नक्षत्रास हरवलेलं गवसेल. आश्लेषा नक्षत्राच्या व्यक्तींनी सप्ताहारंभी असंगाशी संग टाळावा. विद्युत उपकरणांपासून जपावं.

परदेशगमनाची चाहूल लागेल

सिंह : सप्ताहातील ग्रहमान छान गोपाळकाला साजरा करणारं. प्रेमिकांची स्पंदनं प्रचंड प्रभावी राहतील. मघा नक्षत्राच्या व्यक्ती अनेक माध्यमांतून लक्ष वेधून घेतील. पूर्वा नक्षत्राच्या व्यक्तींना ता. २८ व २९ हे दिवस सर्व बाबतीत छान कनेक्टिव्हिटी ठेवतील. नोकरीत प्रशंसा. परदेशगमनाची चाहूल लागेल. उत्तरा नक्षत्राच्या व्यक्तींना सप्ताह प्रवासात जपण्याचा. पाकीट सांभाळा.

अन्नातल्या संसर्गापासून काळजी घ्या

कन्या : गुरुभ्रमणाच्या प्रभावात गोपाळकाला साजरा करणार आहात. उत्तरा नक्षत्राच्या व्यक्ती कलात्मक रंग उधळतील. काहींना वैवाहिक जीवनातील सुवार्ता धन्य करतील. हस्त नक्षत्राच्या व्यक्तींना ता. २७ ते २९ हे दिवस जीवनात मोठी जान आणतील. घरात मोठे सोहळे घडतील. चित्रा नक्षत्राच्या व्यक्तींनी आजच्या रविवारी अन्नसंसर्गापासून जपावं. प्रवासात जपा.

कलाकारांचे भाग्योदय होतील

तूळ : सप्ताहारंभी वक्री बुधाचे एक फिल्ड राहील आणि मंगळ भ्रमणाच्या झळा विशाखा नक्षत्रास जाणवतील. आजचा रविवार सार्वजनिक ठिकाणी जपा. चित्रा नक्षत्राच्या व्यक्तींनी सहली करमणुकीतील अतिरेक सांभाळावा. बाकी स्वाती नक्षत्राच्या व्यक्तींना ता. २८ व २९ हे दिवस अनेक माध्यमांतून रंगतदार राहतील. कलाकारांचे भाग्योदय होतील, पुत्र चिंता जाईल.

काहींची कर्जमुक्ती होईल

वृश्चिक : बहारो फुल बरसाओं असाच सप्ताह राहील. विशाखा नक्षत्राच्या व्यक्तींना बलवत्तर विवाहयोग. उद्याची श्रीकृष्णजयंती चांगलीच लक्षात राहील. अनुराधा नक्षत्राच्या व्यक्तींना ता. २६ व २७ हे दिवस नोकरी-व्यावसायिक संदर्भातून मोठ्या सुवार्ता देतील. काहींची कर्जमुक्ती होईल. ज्येष्ठा नक्षत्राच्या व्यक्तींना सप्ताहाची सुरुवात विशिष्ट नुकसानीचे भय दाखवेल.

वास्तुविषयक व्यवहार होतील

धनू : वक्री बुधाची स्थिती सुरुवातीस आरोग्यविषयक बाबीतून त्रस्त करणारी. उत्तराषाढा नक्षत्राच्या व्यक्तींना सुरवात वेदनायुक्त राहू शकते. काहींना व्यावसायिक कामगार पीडा सतावेल. सप्ताहातील शुक्रभ्रमण मूळ नक्षत्राच्या व्यक्तींना ता. २८ ते ३० व्यावसायिक पार्श्वभूमीवर छान प्रतिसाद देईल. काहींचे वास्तुविषयक खरेदी-विक्रीचे व्यवहार मार्गी लागतील. पूर्वाषाढा नक्षत्राच्या व्यक्तींची कर्जमंजुरी होईल.

परदेशातल्या शिक्षणविषयक संधी येतील

मकर : उद्याची श्रीकृष्ण जन्माष्टमी आणि मंगळवारचा गोपाळकाला मोठा रंगतदार राहील. उत्तराषाढा नक्षत्राच्या व्यक्तींना मोठे भाग्यसंकेत मिळतील. तरुणांचे विवाह ठरतील. श्रवण नक्षत्रास छान नोकरीचा लाभ होईल. परदेशात काहींना शिक्षणाच्या संधी येतील. नवपरिणितांना अपत्य लाभ. धनिष्ठा नक्षत्राच्या व्यक्तींना न्यायालयीन प्रकरणातून लाभ. मातृचिंता जाईल.

आचारसंहितेचे पालन करावे

कुंभ : वक्री बुधाची पार्श्वभूमी आणि मंगळभ्रमण मोठे उपद्रवमूल्य असलेले असून कोणत्याही वादात पडू नका किंवा वाद ओढवून घेऊ नका. पूर्वा-भाद्रपदा नक्षत्राच्या व्यक्तींनी पूर्ण आचारसंहिता पाळण्याची गरज. बाकी ता. २८ ते ३० हे दिवस शततारका नक्षत्राच्या व्यक्तींना शुभग्रहांकडून रसद पुरवतीलच. धनिष्ठा नक्षत्राच्या व्यक्तींना जुन्या गुंतवणुकीतून लाभ.

तरुणांना उत्तम कालखंड

मीन : शिस्तबद्ध मंडळींना सप्ताह चांगलाच लाभ करून देईल. शुभग्रहांचे होणारे ग्रहयोग तरुणांना अतिशय उत्तम साथ देतील. पूर्वा-भाद्रपदा नक्षत्राच्या व्यक्तींना विशिष्ट कलागुणांतून प्रसिद्धीयोग येतील. उत्तरा-भाद्रपदा नक्षत्राच्या व्यक्तींना यंदाची श्रीकृष्ण जयंती जीवनाची एक वेगळी सौंदर्यवादी दृष्टी देईल. रेवती नक्षत्राच्या व्यक्तींना गोपाळकाल्याचा दिवस मोठ्या वैयक्तिक सुवार्तांची पार्श्वभूमी ठेवेल.