रेल्वेतून सोने लुटणाऱ्या महिलेसह चौघा भामट्यांना अटक

जळगाव : कुरिअर कंपनीत डिलिव्हरी मॅन म्हणून सोन्याचे दागिने पोहोचविण्याचे काम करणाऱ्या ६४ वर्षीय वृद्धाचे हावडा एक्स्प्रेसमधून ७ ऑगस्टाला २२ लाखांचे दागिने चोरीला गेले होते. दागिने लांबविणारी टोळी जळगावची असल्याची माहिती एमआयडीसी पोलिसांना मिळाली होती. त्यावरून एका महिलेसह या टोळीतील चौघांना पोलिसांनी अटक केली आहे. अटकेतील संशयितांकडून १४ लाखांचे सोने जप्त करण्यात आले आहे. (Latest Marathi News)

जळगाव शहरातील प्रख्यात सराफा व्यवसायिकांचे मुंबईत पार्सल घेऊन जाण्याचे काम हरिश्चंद्र खंडू वरखेडे (वय ६४) कुरिअर कंपनीचे कर्मचारी करीत होते. रविवारी (ता. ७) ते तीन सराफा व्यवसायिकांचे एकूण २२ लाख ४३ हजारांचे सोन्याचे दागिने असलेले पार्सल घेऊन हावडा एक्स्प्रेसने मुंबईच्या दिशेने निघाले होते. पाचोरा रेल्वेस्थानकाजवळ सतवीर बलवंतसिंग टाक व त्याचा साथीदार रहीम (दोन्ही रा. जळगाव) यांनी खिडकी बंद करण्याच्या बहाण्याने वरखेडे यांच्याजवळील सोन्याचे पार्सल असलेली पिशवी हिसकावून पळ काढला होता. वरखेडे यांनी सहप्रवासी व रेल्वे पोलिसांच्या मदतीने एका चोराला गाडीतच पकडले. मात्र त्यापूर्वीच इतर तिघांनी सोन्याची बॅग घेऊन पोबारा केला हेाता.

पोलिसांनी ताब्यात घेतलेल्या टाक याची चौकशी केल्यावर त्याचे इतर साथीदार शिरसोली नाका परिसरात असल्याची माहिती त्याने दिली. याबाबत रेल्वे पोलिसांनी तत्काळ एमआयडीसीचे पोलिस निरीक्षक प्रताप शिकारे यांना माहिती दिली. क्षणाचाही विलंब न करता त्यांच्या पथकातील उपनिरीक्षक दीपक जगदाळे, किशोर पाटील, छगन तायडे, अश्विनी इंगळे यांनी भावना जवाहरलाल लोढा, तनिष्का भावना लोढा व अनिल रमेश चौधरी (तिघे रा. आयोध्यानगर) यांना ताब्यात घेतले. त्यांच्याकडून १९ तोळे सोने हस्तगत करण्यात आले. या चौघांना न्यायालयाने १२ ऑगस्टपर्यंत पोलिस कोठडीत रवाना केले आहे.

माय-लेकीचा टोळीत समावेश

भावना जवाहरलाल लोढा आणि तनिष्का भावना लोढा या मायलेकीचा या टोळीत समावेश असून, रेल्वे प्रवासात झालेल्या लूट प्रकरणात प्रमुख भूमिका या दोघींची असल्याचे पोलिसांनी सांगितले. त्यांच्याकडून इतरही गुन्हे उघडकीस येण्याची शक्यता वर्तविली जात आहे.