Jalgaon Bribe Crime : अनुदानाची रक्कम प्राप्त करून देण्याच्या मोबदल्यात लाच घेताना दोघांना अटक

Jalgaon Bribe Crime : शेळी पालनासाठी दुसऱ्या टप्प्यातील अनुदानाची रक्कम प्राप्त करून देण्याच्या मोबदल्यात ५ हजार रूपयांची लाच स्विकारताना येथील वसंतराव नाईक भटके विमुक्ती जाती महामंडळाचे जिल्हा व्यवस्थापक व कंत्राटी पंटरला लाचलुचपत प्रतिबंधक विभागाच्या पथकाने अटक केली आहे. (2 arrested for taking bribe jalgaon crime news)

जिल्हा व्यवस्थापक भीमराव लहू नाईक (वय ५५) व कंत्राटी सेवक आनंद नारायण कडेवाल (वय ३४) अशी या दोघांची नावे आहेत. बोरावल (ता. यावल) येथील तक्रारदाराने महामंडळाच्या कार्यालयात शेळीपालनासाठी १ लाख रुपयांचे कर्जाचे प्रकरण दाखल केले होते. त्यापैकी ७५ हजार रुपयांचा पहिला हप्ता मंजूर झाला.

उर्वरीत २५ हजारांचा हप्ता मंजूर करण्यासाठी जिल्हा व्यवस्थापक नाईक यांनी सोमवारी (ता. ४) स्वतःसाठी ३ हजार व कंत्राटी सेवक कडेवाल यांच्यासाठी २ हजारांची लाच मागितली होती.

हेही वाचा : Credit Card फसवणूक....काय घ्याल काळजी?

त्यावर तक्रारदाराने दिलेल्या माहितीनुसार सापळा रचून मंगळवारी (ता. ५) कार्यालयातच दोघांना लाच घेतांना पकडण्यात आले.

रामानंदनगर पोलिसात गुन्हा दाखल करण्याचे काम सुरू होते. लाचलूचपत प्रतिबंधक विभागाचे पोलीस उपअधीक्षक सुहास देशमुख, पोलीस निरीक्षक अमोल वालझाडे, एएसआय दिनेशसिंग पाटील, सुनील वानखेडे, प्रणेश ठाकुर, राकेश दुसाने यांच्यासह पोलीस निरीक्षक एन. एन. जाधव, एएसआय सुरेश पाटील, हवालदार रवींद्र घुगे, महिला हवालदार शैला धनगर, नाईक किशोर महाजन, प्रदीप पोळ, अमोल सूर्यवंशी, सचिन चाटे आदींच्या पथकाने ही कामगिरी केली.