जळगाव : मालवाहू गाडीच्या धडकेत दुचाकीस्वार जागीच ठार

जळगाव : विटनेर गावाजवळ भरधाव मालवाहू गाडीने दिलेल्या जोरदार धडकेत (Accident) मोताळा येथील दुचाकीस्वार जागीच ठार (Death) झाल्याची घटना घडली. तर मालवाहू गाडीतील तीन जण जखमी झाले आहे. (2 wheeler driver was killed on spot in pickup collision jalgaon Latest Accident News)

जळगाव तालुक्यातील विटनेर गावापासून चार किलोमीटर अंतरावर नेरीकडून एरंडोलकडे जाणाऱ्या महिंद्रा पिकअप मालवाहू गाडी (जीजे ०५ बीटी ६४८९) ने समोरून येणाऱ्या मोटारसायकलस्वारास (एमएच २८ डब्ल्यू ९४४०) जोरदार धडक दिल्याची घटना रविवारी (ता. १०) दुपारी साडेबारा वाजेच्या सुमारास घडली.

या अपघातात दुचाकीस्वार साहेबराव चिमा शिंदे (रा. चिंचखेडा, ता. मोताळा जि. बुलढाणा) या तरुणाचा जागीच मृत्यू झाला. तर गाडीतील चालकासह इतर दोघे जखमी झाले आहे. जखमींना तातडीने रूग्णवाहिकेने जिल्हा शासकीय वैद्यकीय महाविद्यालयात उपचारार्थ दाखल करण्यात आले आहे. या भीषण अपघातात दुचाकीचा अक्षरश: चेंदामेंदा झाला आहे. महिंद्रा पिकअप गाडी ही रस्त्याच्या चारीत पडली.