पाचोरा येथे पिस्तूल बाळगणाऱ्या चौघांना अटक

पाचोरा (जि. जळगाव) : येथील भडगाव रोड परिसरात पिस्तूल (Pistol) बाळगत कारमध्ये फिरणाऱ्या चौघांना पाचोरा पोलिसांनी सापळा रचून ताब्यात घेतले आहे. चौघांविरुद्ध गुन्हा दाखल झाला आहे. (4 arrested for carrying pistols in Pachora Jalgaon Crime news)

भडगाव रोड परिसरातून काही तरुण कारमधून शस्त्रास्त्र नेत असल्याची माहिती पोलिस हवालदार योगेश पाटील यांना मिळाल्यानंतर उपनिरीक्षक गणेश चौभे, हवालदार सुनील पाटील, योगेश पाटील, प्रवीण परदेशी, समीर पाटील या पोलिस पथकाने भडगाव रोड परिसरात फिरून वाहनांची तपासणी सुरू केली. भडगाव रोड भागातील समर्थ व्हॅलीजवळ मध्यरात्री साडेतीन वाजेच्या सुमारास एमएच १९ एएक्स ९८११ क्रमांकाची इंडिका कार थांबवून चौकशी केली असता कारमधील चौघांनी भयभीत होऊन उडवाउडवीची उत्तरे दिल्याने पोलिसांचा संशय बळावला. त्यांनी चौकशी व तपासणी केली असता त्यांच्याजवळ राखाडी रंगाचे कव्हर लावलेली २५ हजार रुपये किमतीची पिस्तूल मिळून आली.

पिस्तूल बाळगणाऱ्या भैय्या निकुंभे (वय २५) रोहित झोगडे (वय २२, रा. नाशिक), नितीन नासरे (वय २७, रा. अकोला) व सचिन पाटील (वय ३२, रा. पाचोरा) या चौघांना ताब्यात घेतले आहे. पोलिसांनी २५ हजार रुपयांची पिस्तूल व २ लाख ५० हजार रुपयांची इंडिका कार जप्त केली असून पुढील तपास पोलिस निरीक्षक किसनराव नजन-पाटील यांच्या मार्गदर्शनाखाली सहाय्यक फौजदार प्रकाश पाटील करीत आहेत.