Sand Transport News : आव्हाणे शिवारात वाळू उपसा करणारे 7 डंपर, 5 ट्रॅक्टर जप्त

Jalgaon News : आव्हाणे शिवारातील गिरणा नदीपात्रात सायंकाळी सातच्या सुमारास अवैध वाळू भरणारे सात डंपर आणि पाच ट्रॅक्टर महसूलच्या पथकाने ताब्यात घेतले.

आतापर्यंतची ही सर्वांत मोठी कारवाई असून, संबंधितांवर गुन्हे दाखल करण्याचे काम रात्री उशिरापर्यंत सुरू होते.

गेल्या काही दिवसांपासून वाळूचा अवैध उपसा करून वाहतूक केली जात होती. या अवैध उपशामुळे महसूल प्रशासनावर टीकेची झोड उठली होती. (7 dumpers 5 tractor seizing sand in Avhane Shivar Jalgaon Sand Transport News)

मागील आठवड्यात राष्ट्रवादी कॉंग्रेसने आंदोलन करून प्रशासनालाच आरोपीच्या पिंजऱ्यात उभे केले होते. त्यामुळे महसूल प्रशासनाच्या कार्यक्षमतेवर प्रश्‍नचिन्ह निर्माण झाले होते.

दरम्यान, सोमवारी (ता. १२) सायंकाळी सातच्या सुमारास आव्हाणे शिवारातील गिरणा नदीपात्रात डंपर आणि ट्रॅक्टर वाळूची चोरटी वाहतूक करणार असल्याची माहिती महसूलच्या पथकाला मिळाली.

हेही वाचा : Credit Card फसवणूक....काय घ्याल काळजी?

त्यावरून प्रांताधिकारी महेश सुधळकर, तहसीलदार नामदेव पाटील यांच्या मार्गदर्शनाखालील पथकाने नदीपात्रात छापा टाकून वाळू भरण्याच्या प्रयत्नात असलेले सात डंपर आणि पाच ट्रॅक्टर ताब्यात घेतले.

ही कारवाई मंडलाधिकारी देवेंद्र चंदनकर, राहुल वाघ, तलाठी छाया कोळी, वाहनचालक मनोज कोळी यांनी केली. ताब्यात घेतलेली १२ वाहने जिल्हाधिकारी कार्यालयात लावली जाणार असून, पंचनामा करून पुढील कारवाई केली जाणार असल्याची माहिती तहसीलदार नामदेव पाटील यांनी दिली.