Jalgaon Fraud Crime : पार्टटाईम जॉबच्या नावे पावणेसहा लाखांत फसवणूक

Jalgaon Fraud Crime : निधी व अमित असे नावे सांगणाऱ्या दोन अनोळखी सायबर गुन्हेगारांनी एका तरुणीला पार्टटाइम जॉब देण्याचे आमिष देत ५ लाख ७९ हजार ७९४ रुपयांची ऑनलाइन फसवणूक केल्याचा धक्कादायक प्रकारसमोर आला आहे.

या प्रकरणी तरुणीने सायबर पोलिसात तक्रार दिली आहे.(94 lakh fraud rule of giving part time job to young woman jalgaon news )

भुसावळ शहरातील ओम पार्क येथील ३२ वर्षीय तरुणी परिवारासह वास्तव्याला आहे. १९ ऑक्टोबर रोजीपासून व्हाट्सअप व टेलिग्राम या सोशल मीडियावर निधी व अमित अशी नावे सांगणाऱ्या अनोळखी दोन भामट्यांनी तरुणीशी संपर्क साधून पार्टटाइम जॉब देण्याचे आमिष दाखविले.

त्यानंतर फ्लाइट बुकिंगचे टास्क पूर्ण करण्यासाठी खाते रिचार्ज करण्यासाठी त्यांच्याकडून वेळोवेळी ऑनलाइन पद्धतीने एकूण ५ लाख ७९ हजार ७९४ रुपये घेऊन त्यांची आर्थिक फसवणूक केली.

हा प्रकार लक्षात आल्यानंतर तरुणीने मंगळवारी (ता.७) दुपारी ४ वाजता जळगाव सायबर पोलिस ठाण्यात धाव घेत दोन जणांविरोधात तक्रार दिली आहे.

त्यानुसार अमित आणि निधी असे नावे सांगणाऱ्या व्यक्तींविरोधात जळगाव सायबर पोलिस ठाण्यात गुन्हा दाखल करण्यात आला आहे. पोलिस निरीक्षक लीलाधर कानडे करीत आहे.