अवैध वृक्षतोड प्रकरणी कारवाईसाठी गेलेल्या वनविभागाच्या पथकावर हल्ला

यावल (जि. जळगाव) : अवैध वृक्षतोडीतील संशयिताना पकडण्यासाठी गेलेल्या पथकावर टोळक्याने येथील वन विभागाच्या पथकावर लाठ्या-काठ्यांनी हल्ला करून दगडफेक केली. या प्रकरणी १२ जणांविरोधात येथील पोलिस ठाण्यात शासकीय कामकाजात अडथळा आणणे, शासकीय कर्मचाऱ्यांवर हल्ला करणे, आदी कलमान्वये दंगलीचा गुन्हा दाखल करण्यात आला आहे. (Latest Marathi News)

याबाबत येथील वन विभागाचे वनरक्षक कृष्णा पांडुरंग शेळके यांनी दिलेल्या फिर्यादीनुसार आठ ऑगस्टला वन विभागातील अवैध वृक्षतोडीतील संशयित कैलास वीरसिंग बारेला (रा. काळाडोह) यास अटक करून त्यास वन कोठडी असताना त्याने गुन्ह्यातील अन्य फरार संशयितांची नावे सांगितल्यानुसार त्या फरारी संशयितांना बुधवारी (ता.१७) सकाळी साडेपाचला येथील वनक्षेत्रपाल विक्रम पदमोर यांच्या नेतृत्वाखाली वनपाल रवींद्र तायडे, वनरक्षक प्रकाश बारेला, गोवर्धन डोंगरे, जीवन नागरमोजे, सारंग आढाळे यांच्यासह फिर्यादी शेळके हे सातपुड्यातील पेंझरीपाडा येथे संशयित रंगी रामसिंग पावरा, सुरेश किसन पावरा, जामसिंग पखना बारेला, बिलालसिंग जामसिंग बारेला, प्यारसिंग रामसिंग बारेला, सखाराम जामसिंग बारेला, इना कमरू बारेला यांना पकडले असता त्यांचे नातेवाईक सीमा सखाराम बारेला, रसिका जामसिंग बारेला, मंजुराबाई सुरेश बारेला, सावळीबाई कमरू बारेला ,व्यापारीबाई तुळशीराम बारेला यांनी पाठीमागून येऊन पथकावर लाथ्याकाठ्यांनी हल्ला करून दगडफेक केली.

या प्रकरणी येथील पोलिस ठाण्यात बारा संशयितांसह अज्ञात दहा ते पंधरा आरोपींविरुद्ध येथील पोलिस ठाण्यात शासकीय कर्मचाऱ्यास मारहाण करणे, शासकीय कामात अडथळा आणणे, यासह दंगलीचा गुन्हा दाखल करण्यात आला आहे.