हळदीच्या दिवशीच नवरदेवाला मारहाण

भडगाव (जि. जळगाव) : आपल्या जातीच्या मुलीशी लग्न करीत असल्याच्या रागातून देव्हारी-कनाशी (ता. भडगाव) येथील नवरदेवाला हळदीच्या दिवशी जमावाने मारहाण केली. ही घटना रविवारी (ता. ५) घडली. आपल्या भावी पतीला मारहाण करणाऱ्यांविरोधात नववधूने दिलेल्या तक्रारीवरून पोलिसांत गुन्हा दाखल झाला आहे.

देव्हारी-कनाशी येथील समाधान पाटील याचा विवाह आरती ज्ञानेश्वर बोर्डे (वय २०, रा. बोराडी, ता. चिखली, जि. बुलढाणा) यांच्याशी ठरला होता. हा विवाह ६ जूनला देव्हारी-कनाशी येथे होणार असल्याने ५ जूनला समाधान पाटीलला हळद लावली जात होती. त्या दिवशी रात्री नऊच्या सुमारास देव नाचविण्याचा कार्यक्रम सुरू असताना, सुकदेव देवराम सोनवणे, समाधान देवराम सोनवणे, दिलीप रतन गायकवाड (सर्व रा. देव्हारी), रोहिदास लक्ष्मण भिल (रा. बोदर्डे) हे २० ते २५ लोकांच्या जमावासह त्या ठिकाणी आले व ‘समाधान पाटील हा आपल्या जातीच्या मुलीशी विवाह करीत आहे, याला जिवंत सोडू नका’, असे म्हणत सुकदेव सोनवणे याने समाधानच्या हनुवटी व मानेवर कुऱ्हाडीने वार केला. अचानक घडलेल्या या प्रकारामुळे तेथे उपस्थित असलेली वऱ्हडी मंडळी त्याला वाचविण्यासाठी आली असता, त्यांनाही जमावाने धमक्या देत घरातील, मंडपातील खुर्च्या अस्ताव्यस्त फेकल्या. याबाबत माहिती कळताच पोलिस घटनास्थळी आले असता, जमावाने पोलिसांशीही हुज्जत घातली. काही जणांनी पोलिसांच्या शासकीय वाहनावर (एमएच १९, सीझेड ८५९७) दगडफेक करून वाहनाच्या काचा फोडून नुकसान केले.

याप्रकरणी नववधू आरती बोर्डे हिने दिलेल्या तक्रारीवरून भडगाव पोलिस ठाण्यात मारहाण करणाऱ्यांविरोधात गुन्हा दाखल झाला आहे. पोलिसांनी संशयित सुकदेव सोनवणे, समाधान सोनवणे, दिलीप गायकवाड व रोहिदास भिल यांना ताब्यात घेतले. या सर्वांना भडगाव न्यायालयात हजर केले असता, न्यायालयाने ९ तारखेपर्यंत चार दिवसांची पोलिस कोठडी सुनावली.