जळगाव : लस घेणाऱ्यांनाच योजनांचा लाभ; जिल्हाधिकारी राऊत

अमळनेर : दोन दिवसांच्या महालसीकरण शिबिरात सुमारे ४८०० नागरिकांचे घरोघरी जाऊन लसीकरण करण्यात आले. जिल्हाधिकारी अभिजित राऊत यांनी भेट देऊन विविध ठिकाणी पाहणी केली. प्रत्येक ठिकाणी डोस घेतल्याचे प्रमाणपत्र मागवा किंवा आरटीपीसीआर चाचणी निगेटिव्ह अहवाल मागवा; अन्यथा लस न घेणाऱ्यांना शासनाच्या लाभार्थी योजनेचे लाभ देऊ नका, अशा सूचना राऊत यांनी भेटीप्रसंगी अधिकाऱ्यांना दिल्या.

तालुक्यात शुक्रवार (ता. १०) व शनिवार (ता. ११) असे दोन दिवस महालसीकरण शिबिर घेण्यात आले. या वेळी जिल्हाधिकारी राऊत, प्रांताधिकारी सीमा अहिरे, तहसीलदार मिलिंद वाघ, नगराध्यक्षा पुष्पलता पाटील, मुख्याधिकारी प्रशांत सरोदे, उपमुख्याधिकारी संदीप गायकवाड, तालुका वैद्यकीय अधिकारी डॉ. गिरीश गोसावी, पालिकेचे वैद्यकीय अधिकारी डॉ. विलास महाजन, डॉ. राजेंद्र शेलकर, संजय चौधरी यांच्यासह नगरसेवक, समाजसेवक यांनी गल्लोगल्ली फिरून नागरिकांना लस घेण्याचे आवाहन केले.

जिल्हाधिकाऱ्यांनी केली पाहणी

शहरातील शाहआलमनगर, जिनगर गल्ली, गांधलीपुरा, इस्लामपुरा, कसाली मोहल्ला यासह काही भागात नागरिकांनी प्रखर विरोध केला, तर काही ठिकाणी टाळाटाळ केली, नकार दिला. जिल्हाधिकारी राऊत यांनी लस न घेणाऱ्या नागरिकांना रेशन धान्य, पेट्रोल आदी बाबी देऊ नका, प्रत्येक ठिकाणी डोस घेतल्याचे प्रमाणपत्र किंवा ४८ तासांच्या आतील आरटीपीसीआर चाचणीचा निगेटिव्ह अहवाल मागवा, असे आदेश दिले.

प्रत्येक प्रभागातील पथकात एक परिचारिका, दोन आशा स्वयंसेविका, एक वसुली कर्मचारी, एक मुकादम व प्रभागातील सफाई कर्मचारी असे पथक लसीकरणासाठी परिश्रम घेत होते. दुकानदारांना त्यांच्या दुकानावर जाऊन लस देण्यात आली. त्याचप्रमाणे बाहेरगावाहून आलेले मजूर, स्थलांतरित लोक यांना झोपडीत, रस्त्यावर लस देण्यात आली. पहिल्या दिवशी सकाळ व दुपारच्या सत्रात ८१८ नागरिकांना पहिला डोस, १ हजार ५४६ नागरिकांना दुसरा डोस असा एकूण २ हजार ३६४ लोकांना तर दुसऱ्या दिवशी सकाळच्या सत्रात ३८१ लोकांना पहिला डोस, ६३४ लोकांना दुसरा डोस असे १ हजार १५ डोस व दुपारचे सत्र मिळून दोन्ही दिवसाचे सुमारे ४ हजार ८०० नागरिकांना लसीकरण करण्यात आले.