रुग्ण ‘होमक्वारंटाइन’च्या नावाखाली चक्क रस्त्यावर 

जामनेर : गेल्या महिनाभरापासून पुन्हा कोरोना रुग्णांची संख्या वाढत असताना त्यातील काही महाभाग रुग्ण सरकारी दवाखान्यातून औषध, गोळ्या घेऊन गृहविलगिकरण (होमक्वारंटाइन) नावाखाली चक्क रस्त्यांवर, चौकात फिरताना आढळून येत आहेत. या अक्षम्य निष्काळजीपणाचा फटका मात्र इतरांना नकळतच सहन करावा लागत आहे. 

अशाच एका घटनेत मंगळवारी (ता. ९) सकाळी साडेदहा ते अकराच्या सुमारास एका कोरोना पॉझिटिव्ह रुग्णाला काही सामाजिक कार्यकर्त्यांनी तो निर्धास्तपणे गर्दीत हिंडत असताना चांगलेच सुनावले आणि त्याला बरा होईपर्यंत घराबाहेर न पडण्याची सक्त ताकीद दिली. विद्यमान परिस्थितीत दररोज दोन ते पाच रुग्णांची वाढ शहरासह तालुक्यात होताना दिसते. त्या सर्वांना नियमांच्या आधीन राहूनच सरकारी वैद्यकीय अधिकारी आपापल्या घरीच योग्य त्या सूचनांखाली क्वारंटाइन केले जात आहे. मात्र, यातील बहुतांश रुग्ण स्वतःचा तर घात करीत आहेतच पण घरातील लहान लहान बालके, वयस्कर लोकांच्याही ते नकळत संपर्कात येतात, अशामुळे हा धोका आहे त्यापेक्षा जास्त वाढू शकतो. याला वरिष्ठ पातळीवरून जाणीवपूर्वक लक्ष घालून कायमस्वरूपी आळा कसा घालता येईल, यासाठी ठोस उपाययोजनांची मागणी या घटनेच्या निमित्ताने नागरिकांनी केली आहे. 

कोरोना रुग्णाने स्वत:ची काळजी घेण्याबरोबरच इतरांच्याही आरोग्याची काळजी घेणे आवश्यक आहे. शिवाय आपल्याकडे आता सरकारी दवाखान्यासह पळासखेडा येथे रुग्णांची व्यवस्था करण्यात येत आहे. पालिकेनेही सतर्क राहण्याची आवश्यकता आहे. 
-डॉ. विनय सोनवणे, अधीक्षक, उपजिल्हा रुग्णालय, जामनेर 
 

संपादन- भूषण श्रीखंडे