सावधान: जळगाव जिल्ह्यात कोरोना संसर्गाचा धोका वाढला 

 जळगाव : जिल्ह्यात कोरोनाचा संसर्ग पुन्हा वाढण्याचा धोकानिर्माण झाला आहे. सोमवारी प्राप्त अहवालांवरुन ही गंभीर बाब समोर आली. सोमवारी अवघ्या तीनशे चाचण्यांच्या अहवालात तब्बल ४७ नवे रुग्ण आढळून आल्याने आरोग्य यंत्रणेची चिंता वाढली आहे. दुसरीकडे जळगाव शहरातही संसर्ग वाढतच असून एकाच दिवसात तब्बल २९ नवे रुग्ण आढळले आहेत. 

आवश्य वाचा- ‘कृउबा’तील हमाली दरवाढीचा प्रस्ताव शेतकऱ्यांना अमान्य  ​
 

जळगाव जिल्ह्यात सप्टेंबरच्या दुसऱ्या पंधरवड्यापासून कोरोनाचा संसर्ग नियंत्रणात येत असल्याचे चित्र होते. जानेवारी अखेरपर्यंत हा ट्रेंड कायम होता. नवे रुग्ण कमी व बरे होणारे अधिक असे आकडे समोर येत होते. मात्र, फेब्रुवारी महिन्यात पुन्हा नव्या रुग्णांची संख्‌या अधिक व बरे होणारे कमी, असे आकडे समोर येऊ लागले आहे. 

तब्बल ४७ नवे रुग्ण 
सोमवारी अवघ्या ३१२ चाचण्यांचे अहवाल प्राप्त झाले, त्यात नवे ४७ रुग्ण समोर आले आहेत. म्हणजे पॉझिटिव्हीटी रेट तब्बल १५ टक्क्यांवर असून ही धोक्याची घंटा असल्याचे मानले जात आहे. त्यात आरटीपीसीआरच्या ९३ चाचण्यांमधून ३५ व ॲन्टीजेनच्या १७५ चाचण्यांपैकी १२ रुग्ण पॉझिटिव्ह आले. त्यामुळे जिल्ह्यातील एकूण रुग्णसंख्या ५७ हजार ३५४ वर पोचली. दिवसभरात २८ रुग्ण बरे झाल्यानंतर बरे होणाऱ्यांचा आकडा ५५ हजार ६६५ झाला आहे. गेल्या २४ तासांत भुसावळ तालुक्यातील ७५ वर्षीय महिलेचा मृत्यू झाल्याने मृतांचा आकडा १३६० झाला आहे. 

आवर्जून वाचा- चोपडा तालुक्यात ११७ एकरमध्ये होणार‘एमआयडीसी’ प्रकल्प
 

जळगाव शहरात संसर्ग 
जळगाव शहरात दररोज आढळून येणाऱ्या रुग्णांची संख्या वाढतच आहे. आजही तब्बल २९ रुग्ण समोर आले. तर चाळीसगाव तालुक्यात ९, बोदवड २, पाचोरा व भुसावळ तालुक्यात प्रत्येकी २ रुग्ण आढळून आले. भडगाव, चोपडा तालुक्यात प्रत्येकी १ रुग्ण सापडला. 

संपादन- भूषण श्रीखंडे