रावेर-बऱ्हाणपूर रस्त्यालगत अनोळखी तरुणाचा खून

रावेर :  येथील बऱ्हाणपूर रस्त्यालगत असलेल्या गोवर्धन नगर या एकही घर नसलेल्या भागात २६ ते २८ वय असलेल्या युवकाचा खून झाल्याचे आढळून आले आहे. पोलीस आणि फॉरेन्सिक टीम घटनास्थळी पोहोचले असून गुन्हा नोंदवण्याचे काम सुरू आहे.

आवर्जून वाचा- जळगावात दरोडा; बुरखा घातलेल्या टोळीने दाम्पत्याला शस्त्राचा धाक दाखवून २३ लाखाचा मुद्देमाल लुटला
 

याबाबतची अधिक माहिती अशी की, येथील बऱ्हाणपूर रस्त्याला लागून असलेल्या शिवप्रसाद नगरच्या मागे गट नंबर ४८९ मध्ये गोवर्धन नगर आहे. येथील भूखंड विकले गेले असले तरी या भागात एकही घर अद्याप बांधले गेलेले नाही. रावेर बऱ्हाणपूर रस्त्यापासून सुमारे दोनशे मीटर आत असलेल्या या भागात आज सकाळी एक मृतदेह आढळून आला. पोलिसांनी भेट देऊन पाहणी केली असता तो खून असल्याचे निष्पन्न झाले. खून झालेला युवक २६ ते २८ वर्षाचा तरुण आहे. त्याच्या शर्टवर रिलायन्स टेलर, पैठण रोड, औरंगाबाद असा पत्ता आहे.

आवश्य वाचा- जळगाव ग. स. सोसायटीचे संचालक मंडळ बरखास्त; सोसायटीवर प्रशासकाची नियुक्ती 
 

युवकाचा चेहरा रक्ताळलेला असून त्याचा खून होण्यापूर्वी परिसरात झटापट झाली असावी असा पोलिसांचा कयास आहे. त्याच्या शर्टच्या गुंड्या तुटलेल्या होत्या. येथील प्रभारी पोलिस निरीक्षक एस बी पाटील, सहाय्यक पोलीस निरीक्षक शीतलकुमार नाईक, पोलीस निरीक्षक मनोहर जाधव, मनोज वाघमारे यांच्यासह फॉरेन्सिक टीमचे इद्रीस पठाण, विकास वाघ, हरीश परदेशी यांनी नमुने घेतले आहेत. हा युवक कोण, तो कोठून आला, त्याचा खून कोणी आणि कशासाठी केला या प्रश्‍नांची उकल करण्याचे आव्हान आता पोलिसांसमोर आहे.

संपादन- भूषण श्रीखंडे