सायबर भामट्यांनी लावला डॉक्टरांना चुना

जळगाव : तुमचे सिम कार्ड बंद होणार असल्याचे सांगत सायबर भामट्यांनी चक्क डॉक्टरांनाच २४ हजार ९०० रूपयात गंडवल्याची घटना घडली. जिल्हापेठ पोलिस ठाण्यात या प्रकरणी गुन्ह्याची नोंद झाली आहे. महावीरनगरातील रहिवासी कुणाल चौधरी हे एका खासगी हॉस्पीटलमध्ये डॉक्टर म्हणून कार्यरत आहेत. शुक्रवारी (ता. २४) सकाळी ९ वाजता त्यांच्या मोबाईलच्या व्हॉट्सॲपवर ‘सिम २४ तासात बंद होणार आहे, तर त्वरित खालच्या नंबरवर संपर्क साधा’ असा मेसेज आला. त्यावर त्यांनी संपर्क केला असता त्यांच्या बँक खात्यातून २४ हजार ९०० रूपये ऑनलाईन पध्दतीने कमी झाले. हा प्रकार लक्षात आल्यानंतर त्यांनी जिल्हापेठ पोलिस ठाण्यात धाव घेवून तक्रार दिली. त्यांच्या तक्रारीवरून अज्ञाताविरुध्द गुन्हा दाखल झाला आहे.