Eknath Khadse : खडसे नॉटरिचेबल असल्याच्या निव्वळ अफवाच; खरं कारण आलं समोर

Eknath Khadse News : राष्ट्रवादीचे ज्येष्ठ नेते गेल्या आठ दिवसांपासून नॉटरिचेबल असल्याचे वृत्त समोर आले होते.

हेही वाचा - भारतीयांनी जगाला डिजिटल पेमेंट शिकवायची आलीये वेळ...

त्यांच्या अचानक नॉटरिचेबल होण्यामुळे जळगावसह राज्यातील राजकारणात अनेक तर्कवितर्कांना उधाण आले होते.

मात्र, खडसे नॉटरिचेबल झालेले नव्हते, तर, खडसेंच्या पायाची नस दुखावली गेल्यामुळे त्यांना बॉम्बे हॉस्पिटलमध्ये उपचारांसाठी दाखल करण्यात आले होते, अशी माहिती खात्रीलायक सूत्रांनी दिली आहे.

साधारण तीन ते चार दिवस उपचार घेऊन खडसेंना घरी सोडण्यात आले असून, ते घरी आराम करत आहेत. यामुळे त्यांचे दोन्ही फोन लागत नसल्याचे समोर आले आहे.

खडसेंशी गेल्या आठ दिवसांपासून संपर्क होत नसल्याने ते नॉटरिचेबल असल्याची जोरदार चर्चा सुरू झाली होती.

खडसे नॉटरिचेबल असल्याने राज्यात मोठा राजकीय भूकंप होणार? असे वृत्त काही माध्यमांशी प्रकाशित केले होते. परंतु, आता खडसे त्यांच्या पायाच्या उपचारांसाठी बॉम्बे हॉस्पिटलमध्ये दाखल होते.

यामुळेच त्यांचे फोन लागत नसल्याचे समोर आले आहेत. त्यामुळे खडसे नॉटरिचेबल असल्याच्या वृत्तात तथ्य नसल्याचे उघड झाले आहे.

खडसे हे राष्ट्रवादीतील ज्येष्ठ नेते आहेत. मुक्ताई नगरातील ते आमदार असून त्यांनी महाराष्ट्राचं महसूल मंत्रीपदही भूषवलं आहे.

2020 मध्ये भारतीय जनता पार्टीतील मतभेद आणि अस्वस्थतेमुळे त्यांनी 21 ऑक्टोबर रोजी भाजपाला रामराम केलं. त्यानंतर त्यांनी 23 ऑक्टोबर 2020 रोजी त्यांनी राष्ट्रवादी काँग्रेसमध्ये प्रवेश केला.

मात्र, राष्ट्रवादीत प्रवेश केल्यानंतरही खडसेंना कोणतीही मोठी जबाबदारी देण्यात आलेली नाही. त्यामुळे खडसे पक्षात नाराज असल्याच्या चर्चांनी जोर धरला होता.

त्यात गेल्या आठ दिवसांपासून खडसे नॉटरिचेबल असल्याने अनेक चर्चांना उधाण आले होते. मात्र, आता या सर्व चर्चांना पूर्णविराम लागला असून, पायावरील उपचारांसाठी खडसे बॉम्बे हॉस्पिटलमध्ये होते. याचमुळे त्यांचा फोन नॉटरिचेबल होता, अशी माहिती सूत्रांनी दिली आहे.