Nanded Hospital Deaths : महाजन, मुश्रीफ यांनी राजीनामा द्यावा : खडसे

Nanded Hospital Deaths : नांदेड येथे जिल्हा शासकीय रुग्णालयात झालेल्या रुग्णाच्या मृत्यू प्रकरणी तेथील पालकमंत्री गिरीश महाजन व विद्यमान वैद्यकीय शिक्षणमंत्री हसन मुश्रीफ यांनी राजीनामा द्यावा, अशी मागणी राष्ट्रवादी काँग्रेसचे नेते आमदार एकनाथ खडसे यांनी ‘सकाळ’शी बोलताना व्यक्त केली. (eknath khadse statement about mushrif mahajan resign in Nanded Hospital Deaths jalgaon news)

एकनाथ खडसे म्हणाले, की नांदेड येथे जिल्हा शासकीय रुग्णालयात घडलेली घटना दुर्दैवी आहे. उपचाराअभावी रुग्ण दगावणे, ही अत्यंत खेदजनक बाब आहे. अगोदरच राज्यात बालमृत्यूचे प्रमाण अधिक आहे. शासन त्या बाबत गंभीर नाही. त्यात आता नांदेड येथे बालकावर उपचार करण्याचा हलगर्जीपणा करणे, हा निष्क्रियतेचा कळस झाला आहे.

राज्यात जिल्हा शासकीय रुग्णालयात औषध पुरवठा शासनाकडून न होणे हीसुद्धा अत्यंत गंभीर बाब आहे.

याला माजी वैद्यकीय शिक्षणमंत्री व नांदेड जिल्ह्याचे पालकमंत्री गिरीश महाजन व विद्यमान वैद्यकीय शिक्षणमंत्री हसन मुश्रीफ जबाबदार आहेत.

महाजन यांनी पालकमंत्री म्हणून किती वेळा या रुग्णालयाला भेट दिली? गेली पाच वर्षे तेच वैद्यकीय शिक्षणमंत्री होते, त्या वेळी त्यांनी काय केले, असा प्रश्नही निर्माण होत आहे. नैतिकता ठेवून दोघांनी आपल्या मंत्रिपदाचा राजीनामा द्यावा, अशी मागणीही खडसे यांनी केली आहे.