...अन् एकनाथ खडसेंना महाजनांकडून शुभेच्छा!

जळगाव : राष्ट्रवादी काँग्रेसचे (NCP) नेते एकनाथ खडसे (Eknath Khadse) गुरुवारी (ता. ९) विधान परिषदेचा अर्ज दाखल करण्यासाठी विधिमंडळात गेले असता त्या ठिकाणी भाजप (BJP) नेते व माजी मंत्री गिरीश महाजन (Girish Mahajan) यांची भेट झाली. महाजन यांनी खडसे यांच्याशी हस्तांदोलन करून त्यांना शुभेच्छा दिल्या.

भारतीय जनता पक्षाचे नेते व माजी मंत्री गिरीश महाजन यांच्याकडे पक्षाने राज्यसभा उमेदवारांना निवडून आणण्याची जबाबदारी दिली आहे. त्यामुळे शुक्रवारी (ता. १०) होणाऱ्या मतदान प्रक्रियेच्या माहितीसाठी महाजन व चाळीसगाव येथील आमदार मंगेश चव्हाण गुरुवारी (ता. ९) विधिमंडळ परिसरात गेले होते. त्याच वेळी खडसे विधान परिषद उमेदवारी अर्ज दाखल करण्यासाठी विधिमंडळ परिसरात दाखल झाले. त्या वेळी त्यांच्यासमवेत कन्या ॲड. रोहिणी खडसे व कार्यकर्ते होते. आमदार महाजन व आमदार चव्हाण विधिमंडळातून बाहेर जात असताना ॲड. रोहिणी खडसे यांनी आमदार महाजन व आमदार चव्हाण आले असल्याची माहिती दिली. त्याच वेळी कार्यकर्त्यांच्या गराड्यात काही पावले पुढे गेलेले एकनाथ खडसे थांबले व ते पुन्हा मागे वळत आमदार गिरीश महाजन व मंगेश चव्हाण यांच्याकडे आले. त्यांनी खडसे यांच्याशी हस्तांदोलन करून त्यांना शुभेच्छा दिल्या.

कार्यकर्त्यांची जोरदार घोषणाबाजी

श्री. खडसे आपला उमेदवारी अर्ज भरण्यासाठी कार्यकर्त्यांच्या गराड्यातून जात असताना तेवढ्यात समोरून आमदार गिरीश महाजन व मंगेश चव्हाण येताना दिसताच खडसे समर्थकांनी ‘नाथाभाऊ तुम आगे बढो... हम तुम्हारे साथ हैं’ अशा घोषणा दिल्या. कार्यकर्त्यांचा उत्साह पाहून आमदार महाजन यांनीदेखील उपरोधिकपणे भुवया उंचावत या घोषणेला प्रतिक्रिया दिली. या वेळी दोन्ही कट्टर राजकीय विरोधक आमनेसामने आल्याने वातावरण काहीसे गरम झाल्याचे बघायला मिळाले.