सराफा व्यापार्‍यांना गंडा घालणाऱ्याला अटक

जळगाव : पंधरा वर्षांपासून सोन्या-चांदीचे दागिने तयार करणारा कारागीर दोन व्यापाऱ्यांची फसवणूक करून फरारी झाला होता. बापन मंटू कारक (वय 28,रा. पश्चिम बंगाल, ह.मु. मारुती पेठ, जळगाव) असे संशयिताचे नाव असून, शनिपेठ पोलिसांनी पंजाबमधील भटिंडा येथून शिताफीने त्याच्या मुसक्या आवळल्या. संशयितास न्यायालयात हजर केले असता, त्याला गुरुवार पर्यंत पोलिस कोठडी न्यायालयाने सुनावली.

शहरातील मारुती पेठेतील सुशांत तारकनाथ भुतका (वय ४२) यांचा ते राहत असलेल्या परिसरात सोन्या-चांदीचे दागिने बनविण्याचा कारखाना आहे. या कारखान्यात बापन मंटू कारक 15 वर्षांपासून सोन्या-चांदीचे दागिने बनविण्याचे काम करीत होता. यादरम्यान त्याने विश्वास संपादन करून घर बांधकामासाठी पैशांची आवश्यकता असल्याचे सांगत कारखान्याचे मालक सुशांत भुतका यांच्याकडून दोन लाख 60 हजार रुपये घेतले. त्याने दीपक संघवी यांच्याकडूनही 3 लाख 14 हजार रुपये दागिने बनविण्यासाठी घेतले होते.

एके दिवशी बापन कारक दिसून आला नाही. सर्वत्र शोध घेतला, मात्र आढळून आला नाही, तसेच त्याच्याशी संपर्कही केला. मात्र, संपर्कही झाला नाही. सुशांत भुतका यांच्याकडून घेतलेले दोन लाख ६० हजार रुपये व दीपक संघवी यांचे तीन लाख १४ हजार रुपयांचे दागिने परत न करता दोघा व्यापाऱ्यांची एकूण पाच लाख ७४ हजार रुपयांची बापन कारक याने फसवणूक केली होती. या प्रकरणी दोन महिन्यांनंतर सुशांत भुतका यांनी बापन कारक याच्याविरोधात शनिपेठ पोलिसांत तक्रार दिली. त्यावरून शनिपेठ पोलिसांत गुन्हा दाखल झाला आहे.

कारखान्यातून घेतले ताब्यात

फरारी संशयित बापन कारक पंजाबमधील भटिंडा येथे असल्याची माहिती शनिपेठ पोलिस ठाण्याचे उपनिरीक्षक प्रदीप बोरुडे यांना मिळाली. ते रवींद्र बोदवडे, अमोल विसपुते व राहुल घेटे यांचे पथक घेऊन पंजाबला रवाना झाले. या पथकाने त्या ठिकाणावरील सोने-चांदी बनविणाऱ्या मोठ्या कारखान्याच्या इमारतीतून बापन याच्या मुसक्या आवळल्या.