Jalgaon Crime Update : बेकायदा वाळू वाहतूक; 4 Tractor ताब्यात

जळगाव : गिरणा नदीपात्रातून अवैध वाळू वाहतूक करणाऱ्या चार ट्रॅक्टर तालुका पोलिसांनी ताब्यात घेतले. निमखेडी शिवार, खेडी खुर्द शिवार, आव्हाणे फाटा परिसरातून पोलिसांनी ट्रॅक्टर ताब्यात घेतले. ‘सकाळ’ने गिरणा नदीपात्रातून होणाऱ्या बेकायदेशीर वाळू उत्खननाबाबत मालिका सुरू केल्यानंतर पोलिस आणि महसूल प्रशासनाने कारवाईचा धडका लावला आहे.

जळगाव तालुक्यातील गिरणा नदीपात्रात पाणी असताना, जिल्हा प्रशासनाच्या नाकावर टिचून माफिया वाळूची अवैध वाहतूक मोठ्या प्रमाणावर करीत आहेत. दरम्यान, गिरणा नदीपात्रातून निमखेडीसह खेडी खुर्दमार्गे वाळूची अवैध वाहतूक होत असल्याची माहिती पोलिस निरीक्षक रामकृष्ण कुंभार यांना मंगळवारी (ता. ८) दुपारी बाराला मिळाली. (Illegal sand transport Possession of 4 Tractors Jalgaon Crime News)

पोलिस पथकाने दुपारी दोनला निमखेडी शिवारातून खोटेनगर, गुजराल पेट्रोलपंपाजवळील हॉटेल क्रिष्णा व आव्हाणे फाट्याकडून जळगावकडे, तर खेडी खुर्द शिवारातून वाळूची अवैध वाहतूक करणारे विना क्रमांकाची चार ट्रॅक्टर पकडले.

त्यांच्याकडे परवाना असल्याची चौकशी केली असता, त्यांच्याकडे वाळू वाहतुकीचा परवाना नव्हता. या प्रकरणी ट्रॅक्टर चालक राजेंद्र लोटू सोनवणे (वय ३०, रा. खेडी खुर्द पो. कढोली, ता. एरंडोल), गणेश दरबाज कोळी (२९, रा. कोळी वाडा, पाळधी बुद्रुक, ता. धरणगाव) यांच्याविरुद्ध गुन्हा दाखल झाला आहे.