जळगाव : कामांची गुणवत्ता ठेवा, मक्तेदारांची दलाली नको; जयश्री महाजन

जळगाव : शहरातील रस्त्यांची तसेच इतर सुरू असलेल्या कामांची गुणवत्ता ठेवा, ते चांगले असेल तरच त्याला मंजुरी द्या, केवळ मक्तेदारांची दलाली करू नका, अशी तंबी महापौर जयश्री महाजन यांनी महापालिकेच्या बांधकाम विभागाच्या अधिकाऱ्यांना दिली. आमदार सुरेश भोळे यांच्यासमवेत त्यांनी शहरातील विविध विकासकामांची पाहणी केल्यानंतर सायंकाळी अधिकाऱ्यांची बैठक घेतली.

जळगाव महापालिकेची शहरात रस्ते व गटारीची विविध विकासकामे सुरू आहेत. त्यातील काही कामांबाबत नागरिकांच्या तक्रारी येत आहेत. या कामाच्या गुणवत्तेची पाहणी बुधवारी (ता. ६) महापौर जयश्री महाजन यांनी प्रत्यक्ष जागेवर जाऊन केली, या वेळी त्यांनी सुरू असलेल्या कामांचा आढावाही घेतला. नेहरू चौक, पिंप्राळा, खेडी या भागातील रस्ते व इतर कामांची त्यांनी पाहणी केली.

अधिकाऱ्यांना तंबी

दुपारी कामाची पाहणी केल्यानंतर सायंकाळी त्यांनी बांधकाम विभागातील अधिकाऱ्यांची बैठक घेतली. महापौर दालनात सायंकाळी ही बैठक घेण्यात आली. या वेळी उपमहापौर कुलभूषण पाटील उपस्थित होते. महापौर जयश्री महाजन यांनी अधिकाऱ्यांकडून शहरातील सर्व कामांची सद्यःस्थितीची माहिती घेतली. त्यानंतर त्यांनी शहरातील कामाच्या गुणवत्तेबाबत स्पष्ट आदेशच दिले. त्यांनी सांगितले, की शहरातील कामे सुरू आहेत, मात्र त्याच्या गुणवत्तेवर लक्ष द्या, गुणवत्तेशी कोणतीही तडजोड करू नका. काम गुणवत्तेत नसेल तर तातडीने तसा अहवाल द्या. निकृष्ट कामास मंजुरी देऊन मक्तेदाराची दलाली करू नका.

....अन्यथा मक्तेदार काळ्या यादीत

शहरातील कामांबाबत महापौर जयश्री महाजन यांनी सांगितले, की शहरात सद्यःस्थितीत एकूण १६८ कामांचे आदेश देण्यात आले आहेत. त्यातील ७२ कामे पूर्ण झाली आहेत. ७२ कामे अपूर्णावस्थेत आहेत. २२ कामे अद्याप मक्तेदाराने सुरूच केलेली नाहीत. त्यामुळे ही कामे मक्तेदारांनी आठ दिवसांत सुरू करावीत अन्यथा या मक्तेदारांना काळ्या यादीत टाकून त्यांना पाच वर्षे महापालिकेची कोणतीही कामे देण्यात येणार नाहीत.