Inspirational Story : अंधत्वावर मात करीत मिळविली रेल्वेत नोकरी

जीवन चौधरी : सकाळ वृत्तसेवा

Jalgaon News : येथील गरीब कुटुंबातील जन्मतात दोन्ही डोळ्यांनी अंधत्व असलेल्या ज्ञानेश्वर बादशाह (धनगर) या विद्यार्थ्याने अंधशाळेत शिक्षण घेत जिद्दीने रेल्वेत नोकरी मिळविली. एवढंच नाही तर त्याने नोकरीच्या पहिल्या पगारात त्याने शिक्षण घेतलेल्या अंधशाळेतील विद्यार्थ्यांना जेवण दिले. त्याचे हे कर्तृत्व इतरांसाठी खरोखरच प्रेरणादायी आहे. (Inspirational Story Got job in Railways after overcoming blindness)

दहिगाव येथील गरीब कुटुंबातील ज्ञानेश्वर मधुकर बादशाह (धनगर) या विद्यार्थ्याचे इयत्ता पहिली ते दहावीपर्यंतचे शिक्षण धुळे येथील अंध विद्यार्थी शाळेत झाले. जानेवारी २०२४ मध्ये त्याने मुंबई येथील माटुंगा रेल्वेत वर्कशॉप असिस्टंट म्हणून नोकरी मिळविली. आज त्याचे वय २७ वर्षे आहे.

आई-वडिलांची परिस्थिती बिकट असताना व मुळातच दोन्ही डोळ्यांनी अंधत्व असलेल्या या विद्यार्थ्याने इयत्ता पहिली ते दहावीपर्यंत जिद्दीने शिक्षण घेत पुढील शिक्षण कॉलेज मुंबई येथे घेऊन पदवी मिळविली. १८ जानेवारीला तो माटुंगा येथील रेल्वे वर्कशॉप असिस्टंट म्हणून नोकरीला रुजू झाला. (latest marathi news)

त्याचा पहिला पगार येताच त्याने अंधशाळा धुळे येथील विद्यार्थ्यांना मिष्ठान्नाचे जेवण दिले. विद्यार्थ्यांमध्ये जिद्द निर्माण व्हावी, त्यांच्यावर जिद्दीचे संस्कार घडावेत म्हणून त्याने हा उपक्रम राबविला. मुळातच आई-वडील मजुरी करून आपला संसार दाखवीत आहेत.

लहान भाऊ भरत उर्फ आबा बादशाह सुद्धा पदवीचे शिक्षण जळगाव येथे घेत आहे. दोन्ही डोळ्यांनी अंधत्व असूनही जिद्दीने शिक्षण ज्ञानेश्‍वरने कष्टाचे चीज केले. अशीच जिद्द इतर विद्यार्थ्यांनी सुद्धा घ्यावी, असे त्याचे म्हणणे आहे.