Jalgaon Fire Accident: भुसावळात आगीत लाखांचे नुकसान; 8 ते 10 दुकानांचे साहित्य आगीत खाक

भुसावळ : शहरातील डेली मार्केट मधील अडत दुकाने व फळ विक्रेते यांची आठ ते दहा दुकानांना (ता.२५) सकाळी पाच वाजेच्या दरम्यान अचानक आग लागल्याने अंदाजे साठ लाखांचे नुकसान झाल्याचा अंदाज आहे. आज सकाळी ही घटना घडली.

याबाबत फळ विक्रेते इक्बाल बागवान यांना डेली मार्केट मध्ये आग लागल्याची माहिती मिळताच त्यांनी तत्काळ नगरपालिका, अग्निशमन दल तसेच वीज मंडळाला कळविले. काही क्षणातच अग्निशमन दलाचे बंब घटनास्थळी पोचून तब्बल दोन तास सुरू असलेल्या आगीवर नियंत्रण मिळविण्यास यश आले. (Jalgaon fire Accident Bhusawal marathi news)

यामध्ये भगवान चौधरी,नीलेश माळी, किरण महाजन,नरेंद्र चौधरी, युनूस बागवान, फारुख बागवान,इक्बाल बागवान, आसिफ बिस्मिल्ला,बबलू बाविस्कर, किरण भोई,आरिफ बागवान भाजीपाला अडत दुकानदार तसेच फळ विक्रेत्यांचे लाखांचे नुकसान झाले. नेमके आग लागण्याचे कारण समजू शकले नसून ही शॉट सर्किट मुळे लागली की, लावण्यात आली ही एक संशोधनाचा विषय आहे.

गेले तीन ते चार महिन्यापासून उपविभागीय अधिकारी तथा नगरपालिकेचे प्रशासक जितेंद्र पाटील यांच्या दालनात भाजीपाला अडत दुकानदार व फळ विक्रेत्यांची बैठक घेण्यात आली होती. यामध्ये या सर्व व्यापाऱ्यांना कृषी उत्पन्न बाजार समितीमध्ये स्थलांतर करण्यात बाबत सूचना देण्यात आल्या होत्या व स्थलांतर न केल्यास शेवटची अल्टिमेटम दिला होता. मात्र यानंतर व्यापारी त्यांच्या मतावर ठाम होते. (Latest Marathi News)