जळगावच्या कथित घटनेची महिला आयोगाकडून दखल

जळगाव : येथील अजिंठा विश्रामगृह येथे एका अल्पवयीन मुलीवर झालेल्या अत्याचाराच्या सोशल मीडियावर आलेल्या कथित घटनेची दखल राज्य महिला आयोगाने घेतली असून या प्रकरणी आलेल्या पत्रानुसार पोलिसांनी चौकशी सुरू केली आहे, अशी माहिती जिल्हा पोलिस अधीक्षक प्रवीण मुंढे यांनी पत्रकारांशी बोलताना दिली.

शहरातील अजिंठा शासकीय विश्रामगृहावर शनिवारी रात्री अत्याचार झाल्याचे कथित वृत्त सोशल मीडियावर व्हायरल झाले, त्यामुळे राजकीय वर्तुळात खळबळ उडाली आहे. या प्रकरणी आता राज्य महिला आयोगाने दखल घेतली आहे. त्यानुसार पोलिसांनी चौकशी सुरू आहे, याबाबत माहिती देताना जिल्हा पोलिस अधीक्षक प्रवीण मुंढे यांनी सांगितले, की सोमवारी (ता. ८) दिवसभर जळगाव शहरात सोशल मीडियाच्या माध्यमातून शासकीय विश्रामगृहावर एका अल्पवयीन मुलीवर अत्याचार झाल्याच्या बातम्या फिरत आहेत.

त्या अनुषंगाने राज्य महिला आयोगाकडून चौकशी करण्याचे पत्र प्राप्त झाले आहे. त्यानुसार रामानंद पोलिस ठाण्याचे पोलिस निरीक्षक यांच्या माध्यमातून चौकशी सुरू आहे. मात्र यासंदर्भात कोणतेही ठोस पुरावे तसेच कोणतीही तक्रार पीडिता किंवा पीडिताच्या नातेवाइकाकडून प्राप्त नाही. अद्यापही कोणतेही तथ्य या वृत्तातून समोर आलेले नाही. मात्र, राज्य महिला आयोगाच्या पत्राच्या अनुषंगाने ही चौकशी सुरू करण्यात आली आहे. भाजप, काँग्रेस, राष्ट्रवादी काँग्रेस या पक्षातर्फे या प्रकरणाची चौकशी करावी याबाबत निवेदन आम्हास प्राप्त झाले आहे, असेही जिल्हा पोलिस अधीक्षकांनी सांगितले.