Ladki Bahin Yojana: नारिशक्ती ॲपला कासवगतीमुळे CISC केंद्रचालक हैराण! भुसावळ शहरातील स्थिती; लाडकी बहीण अर्ज भरण्यात अडचणी

भुसावळ : मुखयमंत्री एकनाथ शिंदे यांनी माझी लाडकी बहीण योजनेची घोषणा केल्यापासून लाडकी बहीण कागदपत्र जुळवाजुळवा करण्यासाठी भटकंती करीत आहे. त्यात लाडकी बहीण योजनेचा ऑनलाइन अर्ज भरताना महिलांच्या नाकीनऊ आले आहेत. लाडकी बहीण योजनेचे नारी शक्ती ॲप सुरू करण्यात आले.

मात्र, या ॲपवरुनही अर्ज भरण्यासाठी प्रतीक्षा करावी लागत आहे. सर्व्हर डाऊनमुळे एक अर्ज भरण्यासाठी किमान १५ मिनिटे वेळ लागतो, तर यानंतर पुढील अर्ज भरलाच जात नसल्याने सीआयएससी सेंटरचे चालकही हैराण झालेले दिसून येत आहेत. (CISC Center Director shocked due to slow pace of Narishakti App)

राज्य सरकारने मुख्यमंत्री माझी लाडकी बहीण योजना जाहीर केल्यापासून शहरातील महिला या योजनेचा लाभ मिळावा, यासाठी धडपड करताना दिसून येत आहेत. अर्ज भरण्यासाठी आलेल्या महिला हैराण झालेल्या आहेत. लाडकी बहीण योजनेसाठी अर्ज भरताना कुठे सर्व्हर डाऊन, तर कुठे नारी शक्ती ॲप संथगतीने सुरू असल्याचे पाहायला मिळत आहे."नाव नोंदणीसाठी महिलांना सीआयएससी केंद्राबाहेर ताटकळत राहावे लागत आहे.

मध्यरात्री भरले जाताय अर्ज

भुसावळ शहरातील माजी नगरसेवक व सामाजिक कार्यकर्त्यांच्या माध्यमातूनही महिलांसाठी ऑनलाइन अर्ज भरण्याची सुविधा देण्यात आलेली आहे. दिवसा सर्व्हर डाऊनमुळे अर्ज भरले जात नसल्याने आता रात्री एक ते पहाटे चार या वेळेत सर्व्हर डाऊन नसल्याने या वेळेत अर्ज भरले जात आहेत. सामाजिक कार्यकर्त्यांनी व माजी नगरसेवकांनी या सुविधा दिल्याने महिलांना काही अंशी दिलासा मिळाला आहे.