Jalgaon News : पहाण तलाठी कार्यालयाचे बांधकाम निकृष्ट दर्जाचे! शाखा अभियंत्यांचे दुर्लक्ष असल्याचा पाटील यांचा आरोप

नांद्रा (ता.पाचोरा) : पहाण येथील नवीन तलाठी कार्यालयाचे स्वतंत्र कार्यालय मंजूर झाले आहे. गेल्या दोन ते तीन महिन्यांपासून बांधकामाला सुरुवातही झाली आहे. मात्र, या कामाच्या सुरुवातीपासूनच पायाच्या फुटींगा टाकण्यापासून ठेकेदाराकडून निकृष्ट दर्जाचे काम सुरू असल्याच्या तक्रारी अनेकदा सार्वजनिक बांधकाम विभागाच्या शाखा अभियंत्यांकडे केल्या. मात्र, तरीही ते ठेकेदारास पाठीशी घालत असल्याची तक्रार पहाण येथील सरपंच यांचे पती वाल्मीक पाटील यांनी केली आहे. (Jalgaon Construction of Pahan Talathi office of poor quality news)

संबधित तलाठी कार्यालयाच्या नव्याने उभारण्यात येत असलेल्या इमारतीवर गेल्या नऊ मे रोजी सकाळी स्लॅब टाकण्यात आला, तोही दर्जाहीन आहे. त्यावर पाणी मारण्यासाठीही दुसऱ्या दिवशी दुपारपर्यंत कोणीच आले नसल्याचे वाल्मीक पाटील यांनी ‘सकाळ’ला सांगितले.

नांद्रा जिल्हा परिषद गटात तलाठी कार्यालयाचे पाच, तर एक मंडळ कार्यालय असे सहा गावांना ही कामे सुरू आहेत. त्यात नांद्रा येथे ९३ स्क्वेअर मीटरचे तलाठीसह मंडळ कार्यालय, तर कुरंगी, सामनेर, पहाण, दहिगाव, लासगाव या ठिकाणी ६६.४० स्केअर मीटरचे तलाठी कार्यालयाचे कामे भरउन्हाळ्यात सुरू आहेत.

"आजपर्यंत मला जेव्हा जेव्हा पहाण येथील सरपंच यांनी फोन केला किंवा माहिती मागितली. ती मी त्यांना दिली. काल स्लॅब टाकण्यात आला. आज अक्षय तृतीया असल्याने मजूर हे सकाळी पाण्याचे आळे बनविण्यासाठी दुपारी आले."

- काजवे, शाखा अभियंता, सार्वजनिक बांधकाम विभाग, पाचोरा.