Jalgaon Crime News : दाणा बाजारातील ड्रायफ्रूटचे दुकान फोडले; साडेचार लाखांची रोकड लंपास

Jalgaon Crime News : अवघ्या तीनच दिवसांपूर्वी शहर पोलिस ठाण्यासमोरील फुले मार्केटमधील चार दुकाने चोरट्यांनी फोडली होती. सोमवारी (ता. ३) दाणा बाजारातील दोन दुकाने फोडली. छताचा पत्रा कापून ड्रायफ्रूट्‌सच्या दुकानात प्रवेश करून चोरट्यांनी गल्ल्यातील साडेचार लाखांची रोकड चोरून नेली. चोरटा सीसीटीव्ही कॅमेऱ्याची वायर कापताना कैद झाला आहे. याबाबत शहर पोलिस ठाण्यात गुन्हा दाखल झाला आहे. (Jalgaon Crime Dry fruit shop in Dana Bazaar robbed)

गायत्रीनगरातील दिलीप शोभराजमल वाधवाणी यांचे दाणा बाजारात सच्चा सौदा नावाने ड्रायफ्रूटचे दुकान आहे. श्री. वाधवाणी यांनी शनिवारी (ता. १) व्यापाऱ्याला देण्यासाठी आणलेले पैसे दुकानाच्या गल्ल्यात ठेवले होते. मात्र, व्यापारी न आल्यामुळे त्यांनी पैसे तेथेच ठेवून रात्री दुकान बंद करून ते घरी निघून गेले.

रविवारी (ता. २) दुकान बंद होते. दिलीप वाधवाणी यांचा मुलगा हर्ष वाधवाणी याने सोमवारी (ता. ३) सकाळी साडेदहाच्या सुमारास दुकान उघडले. त्यावेळी दुकानाचे छप्पर फाडून चोरी झाल्याचे निदर्शनास आले. तत्काळ हर्ष याने घडलेला प्रकार वडिलांना व पोलिसांना सांगितला. चोरट्याने गल्ल्यातील साडेचार लाख रुपये चोरून नेल्याचे समोर आले. (latest marathi news)

ते आले, त्यांनी पाहिले अन्‌ निघून गेले

घटनेची माहिती मिळाल्यावर शहर पोलिस निरीक्षक अनिल भवारी यांच्याह गुन्हे शोध पथकातील कर्मचारी घटनास्थळी दाखल झाले. त्यांनी दुकानाची पाहणी केली. त्यांना दुकानाच्या छतावरील पत्रा कापलेला दिसून आला. चोरटा दुकानाच्या मागील बाजूने पत्र्यावर चढून तो आत शिरल्याचे दिसून आले.

सीसीटीव्हीची वायर कापली

चोरीपूर्वी चोरट्याने दुकानातील सीसीटीव्ही कॅमेऱ्यांची वायर कापून टाकल्याचे सीसीटीव्ही कॅमेऱ्यात कैद झाले आहे. याबाबत शहर पोलिस ठाण्यात गुन्हा दाखल झाला आहे.