Jalgaon Crime News : असोद्यात पिस्तुलीच्या धाकावर लूट; सट्टापेढी चालकाला पिस्तूल लावून 70 हजारांना लुटले

Jalgaon Crime News : असोदा गावात तोंडाला रूमाल बांधलेल्या अज्ञात गुन्हेगारांनी पिस्तूल लावून सट्टापेढी चालकाची ७० हजारांची रोकड लांबविली. शुक्रवारी (ता. १४) सायंकाळी घडलेल्या या घटनेबाबत पोलिसांत कुठलीही नोंद नसली तरी घडलेल्या प्रकाराने तालुका पोलिसांनी धाव घेत संशयितांचा शोध सुरू केला आहे. ()

असोदा (ता. जळगाव) गावातील ग्रामपंचायत कार्यालयाच्या मागील भागात आडोशाला तोंडाला रूमाल बांधून ट्रिपलसीट दुचाकीवर आलेल्या या भामट्यांनी सट्टापेढी चालकाला पिस्तूल लावून त्याच्या जवळील ७० हजारांची रोकड लांबविली. एक ते दीड वर्षापूर्वीही अशीच घटना या परिसरात घडली आहे.

अवैध धंदा चालवला जात असल्याने तो तक्रार करणारच नाही, याची खात्री बाळगून संशयितांतर्फे ही लूटमार केली गेल्याचे प्रत्यक्षदर्शी ग्रामस्थांनी माहिती देताना सांगितले. घटनेची माहिती मिळताच तालुका पोलिसांनी घटनास्थळावर धाव घेतली. परिसरातील ग्रामस्थांना विचारणा केल्यावर घडलेला प्रकार त्यांनी सांगितला.

ज्याची लूट करण्यात आली होती, त्याला पोलिस ठाण्यात आणण्यात आले होते. त्याने दिलेल्या माहिती आणि वर्णनानुसार संशयितांचा शोध सुरू झाला. परिसरातील सीसीटीव्ही फुटेजही पोलिसांनी बघण्यास सुरवात केली आहे.