Jalgaon Crime News : 27 लाखांच्या डाळींवर डल्ला; फरारी ट्रकचालकाला मध्यप्रदेशातून अटक

Jalgaon Crime News : औद्योगीक वसाहत परिसरातील राघाकृष्ण ॲग्रो इंडस्ट्रीजमधून २७ लाख २९ हजार ६७८ रुपयांची डाळ पनवेल येथे पाठविली होती. मात्र, ट्रकचालकाने परस्पर डाळींची विल्हेवाट लावून फारारी झाला होता. याबाबत एमआयडीसी पोलिसांत गुन्हा दाखल झाला. पोलिसांनी संशयिताला मध्य प्रदेशातून अटक केली आहे. चैत्रबन कॉलनीतील तिलक रवींद्र कबरा (वय ३१) यांचा औद्योगीक वसाहतीत राधाकृष्ण ॲग्रो इंडस्ट्रीज नावाने डाळ मिल आहे. (stolen on 27 lakh of pomegranate police arrested from madhya pradesh )

मिळालेल्या ऑर्डरीनुसार ३० मेस त्यांच्या डाळ मिलमधून अनिल प्रल्हाद खेडकर (रा. पनवेल, जि. रायगड) यांच्या ट्रकमधून (डीडी ०१, एम ९४६५) काबरा यांच्या मिलमधून २७ लाख २९ हजार ६७८ रुपयांची डाळ भरण्यात आली. पनवेल (जि. रायगड) येथे ती डाळ घेऊन ट्रकचालक राजासिंग ऊर्फ राजा अग्निदेवसिंग चौहान (रा. मरसराहा, सिधी, मध्यप्रदेश) ३० मेस निघाला.

मात्र, त्याने नियोजीत ठिकाणी डाळ न पोचविता, परस्पर डाळीची विक्री करून फारारी झाला होता. याबाबत तिलक काबरा यांनी दिलेल्या फिर्यादीवरून एमआयडीसी पोलिस ठाण्यात गुन्हा दाखल झाला. ट्रकचालक राजा चौहान मध्य प्रदेशात त्याच्या घरी येणार असल्याची माहिती पोलिस निरीक्षक बबन अव्हाड यांना मिळाली होती.

त्यावरून गुन्हे शोध पथकातील उपनिरीक्षक दत्तात्रय पोटे, सहाय्यक फौजदार अतुल वंजारी, किरण पाटिल, विशाल कोळी, राहुल रगडे, साईनाथ मुंडे यांनी मध्य प्रदेशातील जंगलातून त्याला ४० लाखांच्या ट्रकसह ताब्यात घेतला. त्याला न्यायालयात हजर केले असता, न्यायाधीश वसीम देशमुख यांनी ६ दिवसांची पोलिस कोठडी सुनावली.

भिवंडीत विकला माल

पोलिसी खाक्या दाखवताच राजा चौहान याने २७ लाख २९ हजार ६७८ रुपयांची डाळ भिवंडी (जि. ठाणे) येथे मिळेल त्या भावात विक्री केल्याचे सांगितले. त्याच्यावर मध्यप्रदेशात खुनाचा गुन्हा दाखल असून, त्याच्या इतर साथीदारांच्या अटकेसह चोरीचा माल जप्तीसाठी पोलिसांचे प्रयत्न सुरू आहेत.