Jalgaon Dam Water Storage : अनेर धरणाचे सर्व दरवाजे उघडले! धरण 58 टक्के भरले

Jalgaon News : अनेर मध्यम प्रकल्पाच्या पाणलोट क्षेत्रात मोठ्या प्रमाणात पाऊस सुरू असल्याने धरणाचा साठा वाढत चालला असून, धरणाचे सर्व दहा दरवाजे उघडण्यात आल्याने सध्या ३७ हजार ६०० क्यूसेक इतक्या वेगाने विसर्ग सुरू आहे. त्यामुळे अनेर नदीला मोठा पूर आला. सद्यस्थितीत धरणात सायंकाळी पाचपर्यंत २१२.७० मीटर इतका साठा असून, आवक वाढत आहे. (All gates of Aner Dam opened)

दरम्यान, दोन्ही काठांवरील गावांना धोक्याचा इशारा देण्यात आला. धरणाची पाण्याची पूर्ण पातळी २१६.४० मीटर इतकी आहे. धरण पात्रात सध्या २८.८२ दशलक्ष घनमीटर इतका साठा असून, तो एकूण साठ्याच्या ५८ टक्के इतका आहे.

धरण पात्रात ९२.७० दशलक्ष घनमीटर इतका पाण्याचा साठा होऊ शकतो. १५ ऑगस्टपर्यंत धरणाचे सर्व दरवाजे उघडे राहणार आहेत. धरण पात्रात रविवारी (ता. २८) १० मिलिमीटर पावसाची नोंद करण्यात आली. आजही पाऊस सुरूच आहे. (latest marathi news)

सातपुड्याच्या डोंगर कपारीतून पावसाचे पाणी मोठ्या प्रमाणात येऊ लागले असून, आजपर्यंत धरणाच्या बॅक वॉटर परिसरात ३६० मिलिमीटर पावसाची नोंद झाली आहे.

"धरणाच्या पाणलोट क्षेत्रात रविवारपासून पाऊस सुरू असल्याने धरणात साठा वाढला. त्यामुळे अनेर धरणातून नदीपात्रात मोठा विसर्ग सुरू आहे. नदीकाठच्या नागरिकांनी खबरदारी घ्यावी."- पी. बी. पाटील, उपविभागीय अधिकारी, अनेर मध्यम प्रकल्प