Lumpy Disease : जळगाव जिल्हा ठरला ‘Hotspot'; 122 जनावरे मृत्यूमुखी

जळगाव : जिल्ह्यातील आठ तालुक्यांत जनावरांमध्ये लम्पी स्किन डीसीज आढळला आहे. त्यामुळे एक हजार ८०० पशूधन बाधित झाले असून, आतापर्यंत १२२ जनावरे मृत्यूमुखी पडले आहेत. लम्पी स्किन आजारामुळे राज्यात सर्वाधिक मृत्यू जळगाव जिल्ह्यात झाले आहेत.

पशूसंवर्धन विभागातर्फे प्रत्येक तालुक्यात लसीकरण मोहीम वेगात सुरू करण्यात आली आहे. त्या अंतर्गत आतापर्यंत दोन लाख २५ हजार जनावरांना लसीकरण करण्यात आले आहे. (Jalgaon District Becomes Hotspot of Lumpy Disease 122 animals died Jalgaon Latest Marathi News)

लम्पी आजाराचा प्रसार बाह्य कीटकांद्वारे (डास, माश्‍या, गोचीड आदी) होत असल्याने आजारी नसलेल्या सर्व जनावरांवर, तसेच गोठ्यात बाह्य कीटकांच्या निर्मूलनासाठी ग्रामपंचायतींतर्फे पशुसंवर्धन विभागाच्या सहकार्याने औषधांची फवारणी करण्यात येत आहे. विषाणुजन्य आणि सांसर्गिक असल्याने या रोगाचा प्रसार होऊ नये, म्हणून प्रतिबंधात्मक उपाययोजना तत्काळ अंमलात आणण्याचे निर्देश जिल्हाधिकारी अभिजित राऊत यांनी दिले आहेत.

लम्पी स्किन प्रतिबंधासाठी उपाययोजना

-जिल्ह्यातील जनावरांचे सार्वजनिक बाजार बंद

-इतर राज्यामधून आंतरराज्य सीमेवरून पशुधनाची होणारी वाहतूक बंद

-पोलिस व उपप्रादेशिक परिवहन विभागातर्फे आंतरराज्य सीमेवरील चेकनाक्यांवर कसून तपासणी

-चराईचे क्षेत्र, पाणवठे बंद

-पशुधन एकत्र येतील, असे सार्वजनिक चराई व सार्वजनिक पाणी पिण्याचे सार्वजनिक हौद काही काळासाठी बंद ठेवले आहेत.

अशी लावा विल्हेवाट

ग्रामपंचायतीनी पशुधन मृत झाल्यास त्याची शास्त्रीय पद्धतीने विल्हेवाट लावण्यासाठी ४ बाय ८ फूट आकाराचा खड्डा करावा. ही व्यवस्था ग्रामपंचायत स्तरावर शक्य नसल्यास गटविकासाधिकाऱ्यांमार्फत पंचायत समिती बांधकाम विभाग किंवा सार्वजनिक बांधकाम विभागाकडून खड्डे करण्याची व्यवस्था करावी. पशुधन विकास अधिकाऱ्यांच्या मार्गदर्शनाखाली शास्त्रोक्त पद्धतीने मृत पशुधनाची विल्हेवाट लावावी.

आजार लपविल्यास कारवाई

सर्व खासगी पदविकाधारकांनी किंवा पशुपालकांनी लम्पी स्किन आजाराची माहिती शासकीय पशुवैद्ययकीय संस्थेस देणे बंधनकारक आहे. लम्पी आजाराचे उपचार पशुधन विकास अधिकारी किंवा त्यांचे मार्गदर्शनानुसारच करावेत. खासगी पदविकाधारकांनी लम्पी स्किन आजारावर परस्पर उपचार करू नयेत, त्याबाबत पशुसंवर्धन विभागाकडे नोंद करावी, अन्यथा उपचार करताना जनावरे हातातून जात असल्याचे दिसत असल्यानंतर शासकीय रुग्णालयाकडे आणणल्यास संबंधित खासगी डॉक्टरांवर कायदेशीर कार्यवाही करण्याचा इशारा दिला आहे.

आकडे बोलतात...

* लम्पी आजाराने बाधित गुरे : ५,१८०

* एकूण मृत गुरे : १२२

* जिल्ह्यातील गुरे : ५ लाख ५० हजार

* आतापर्यंत लसीकरण झालेली गुरे : २ लाख २५ हजार

* प्रत्येक तालुक्यात कार्यरत टीम: ६

"आतापर्यंत जिल्ह्यात लम्पी आजाराने १२२ जनावरांचा मृत्यू झाला आहे. २ लाख २५ हजार गुरांना लसीकरण झाले आहे. साडेपाच लाख गुरांना लसीकरणाचे उद्दिष्ठ आहे. ते लवकरच पूर्ण होईल. पशुपालकांनी गुरांना लम्पीची लागण झाल्याचे लक्षात येताच पशूसंवर्धपन विभागाला कळवून गुरांवर उपचार करून घ्यावेत." - डॉ. श्‍यामकांत पाटील, उपायुक्त, पशुसंर्वधन विभाग