Jalgaon News : अखेर टोकरे कोळी समाजाला मिळाले एसटी जात प्रमाणपत्र; अधिकाऱ्यांच्या हस्ते वितरण

Jalgaon News : येथील प्रांत कार्यालयाबाहेर सुरू असलेले टोकरे कोळी समाजाचे आंदोलन अखेर बाराव्या दिवशी मागे घेण्यात आले. प्रांताधिकारी महादेव खेडकर यांच्या हस्ते आंदोलनकर्त्यांना ५१ एसटीचे जात प्रमाणपत्र वाटप करण्यात आले. टोकरे कोळी समाजाला एसटी संवर्गातून जातीचे दाखले मिळावेत, यासाठी १५ जुलैपासून प्रांत कार्यालयाबाहेर बिऱ्हाड आंदोलन सुरू होते. (Finally Tokare Koli community got ST caste certificate to protester )

अमळनेर व चोपडा तालुक्यांतील आदिवासी कोळी समाजाच्या नागरिकांनी प्रांत कार्यालयाकडे टोकरे कोळी (अनुसूचित जमाती)चे दाखले जातप्रमाणपत्र मिळण्यासाठी सेतू सुविधा केंद्रांमार्फत ऑनलाइन अर्ज सादर केले होते. त्या अर्जांची दोन वेळेस तपासणी व सुनावणी झाली होती. त्या प्रकरणांना सबळ पुरावेही जोडण्यात आले होते. (latest marathi news)

अशा सर्वच प्रलंबित व नवीन ऑनलाइन दाखल होणाऱ्या अर्जांचा निकाल होऊन त्या सर्व अर्जदारांना टोकरे कोळी (एसटी)चे दाखले जात प्रमाणपत्र मिळाले पाहिजे, या मागणीसाठी जगन्नाथ बाविस्कर, सुखदेव सोनवणे, शांताराम कोळी, हिलाल सैंदाणे, रामचंद्र सपकाळे, गोपाल देवराज, भीमराव कोळी यांच्यासह चोपडा, अमळनेर परिसरातील बांधव ठिय्या आंदोलनात सहभागी होते. अखेर प्रांताधिकारी खेडकर, तहसीलदार रूपेशकुमार सुराणा यांनी आंदोलनकर्त्यांची भेट घेत प्रांत कार्यालयाकडे सबळ पुरावे जमा केलेल्या आदिवासी टोकरे कोळी समाजाच्या ५१ व्यक्तींना एसटी संवर्गांतर्गत जात प्रमाणपत्र वाटप केले.