Jalgaon Fraud Crime : भूखंड नावे करून देण्याच्या नावे फसवणूक

Jalgaon Fraud Crime : शहरालगत बखळ प्लॉट नावावर करून देतो, असे सांगून मुक्ताईनगरातील गौरव पवार या तरुणाची १८ लाखांना फसवणूक झाल्याप्रकरणी रामानंदनगर पोलिस ठाण्यात गुन्हा दाखल आहे. दाखल गुन्ह्यातील संशयितांना जिल्‍हा न्यायालयाने अंतरिम जामीन मंजूर केला. जळगाव शहरातील मुक्ताईनगरात वास्तव्यास असलेले डॉ. किरण पवार, डॉ. जुही पवार आणि गौरव रवींद्र पवार यांच्या वतीने रामानंदनगर पोलिस ठाण्यात बुधवारी (ता. १२) दिलेल्या तक्रारीत नमूद केल्याप्रमाणे चंद्रकांत सतीश माहेश्वरी प्लॉटच्या व्यवहारासंदर्भात दिलेली रक्कम व सौदेचिठ्ठीवरून खरेदी करणार गौरव पवार व किरण रवींद्र पवार असे दस्तऐवज असलेले कागदपत्र (स्टॅम्प पेपर) लिहून दिले होते. ( Fraud in favor of plot names )

या संदर्भात चंद्रकांत सतीश माहेश्वरी यांनी १० एप्रिल २०२४ ला त्यांच्यात आणि पवारात झालेला आर्थिक व्यवहार याविषयी पोलिस अधीक्षक व शहर पोलिस ठाण्यात तक्रार दाखल केली होती. या तक्रारीत सावकारी तसेच मला खोट्या गुन्ह्यात अडकवण्याची शक्यता असल्याचे नमूद केले होते, असे असतानाही डॉ. जुही पवार यांचे भाऊ गौरव पवार यांनी रामानंद पोलिस ठाण्यात तक्रार दिल्यावरून गुन्ह्याची नोंद झाली होती.

दाखल गुन्ह्यासंदर्भात चंद्रकांत माहेश्वरी व सतीश माहेश्वरी यांच्या वतीने जिल्हा व सत्र न्यायालयात अटकपूर्व जामिनासाठी अर्ज दाखल केला हेाता. त्यावर सुनावणी होऊन न्या. जयदीप मोहिते यांच्या न्यायालयाने अंतरिम जामीन हा मंजूर केला आहे.

माहेश्वरी यांना पन्नास हजारांचा बॉन्ड तसेच पुढील तारखेपर्यंत दर रविवारी सकाळी ११ ते दुपारी २ यादरम्यान रामानंद पोलिस ठाण्यात प्रत्यक्ष हजेरी लावण्यासंदर्भात आदेश दिले आहेत. या प्रकरणात माहेश्वरींच्यावतीने अ‍ॅड. के. बी. वर्मा यांनी बाजू मांडली. दोन्ही पक्षाचा युक्तिवाद झाल्यावर न्यायालयाने चंद्रकांत माहेश्वरी व सतीश माहेश्वरी यांचा अंतरिम जामीन मंजूर केला आहे.