Jalgaon Agriculture News : उत्राण परिसरातील फळबागांचे लाखो रुपयांचे नुकसान; पंचनामे करण्याचे आदेश

Jalgaon Agriculture News : उत्राण (ता. एरंडोल) परिसरात शनिवारी (ता. ८) झालेल्या पावसामुळे सुमारे आठशे हेक्टरवरील फळबागांचे लाखो रुपयांचे नुकसान झाले असून, फळ उत्पादक शेतकरी आर्थिक संकटात सापडले आहेत. वादळी पावसामुळे शेकडो घरांचे नुकसान झाल्यामुळे अनेकांचे संसार उघड्यावर आले आहेत. आमदार चिमणराव पाटील यांनी उत्राण परिसरात झालेल्या नुकसानीची पाहणी करून नुकसानीचे सरसकट पंचनामे करण्याचे आदेश प्रशासनाला दिले. ( Loss of lakhs of rupees to orchards in Utran area due to stormy rain )

नुकसानग्रस्त शेतकऱ्यांना शासकीय स्तरावरून मदत मिळवून देण्यासाठी शासनाकडे पाठपुरावा करणार असल्याची ग्वाही आमदार पाटील यांनी दिली. लिंबूचे आगार म्हणून ओळख असणाऱ्या उत्राण येथे वादळामुळे सर्वाधिक नुकसान झाले आहे. तालुक्यातील उत्राण, तळई परिसरात शनिवारी (ता. ८) रात्री नऊच्या सुमारास वादळी पावसामुळे उत्राण परिसरातील ७८७ हेक्टरवरील लिंबू, पेरू, मोसंबी, केळी, चिक्कू फळबागांचे लाखो रुपयांचे नुकसान झाले.

शेकडो घरांचे पत्रे उडल्यामुळे अनेकांचे संसार उघड्यावर आले आहेत. वादळामुळे ठिकठिकाणी वृक्ष उन्मळून पडल्यामुळे वाहतूक काही प्रमाणात विस्कळित झाली होती. सुमारे बाराशे शेतकऱ्यांचे फळबागांचे नुकसान झाल्यामुळे त्यांच्यासमोर आर्थिक संकट उभे ठाकले आहे. (latest marathi news)

वादळामुळे लोणचे बनविणाऱ्या निलॉन्स कंपनीचे शेड उडून गेल्यामुळे लाखो रुपयांचे नुकसान झाले. नुकसान झालेल्या फळबागांची आमदार चिमणराव पाटील यांनी पाहणी करून शासनाकडून भरपाई मिळवून देण्याची ग्वाही शेतकऱ्यांना दिली. नुकसानीची माहिती देताना शेतकरी भावनाविवश झाले आहेत.

शिवसेनेचे जिल्हाप्रमुख वासुदेव पाटील, जिल्हा परिषदेचे माजी उपाध्यक्ष ज्ञानेश्वर आमले, बाजार समितीचे माजी सभापती शालिग्राम गायकवाड, पारोळा येथील नागरिक शिक्षणप्रसारक मंडळाचे चेअरमन मिलिंद मिसर, पंचायत समितीचे माजी सभापती अनिल महाजन, उत्राणचे सरपंच आनंदा धनगर यांच्यासह कृषी अधिकारी व पर्यवेक्षक, मंडलाधिकारी, तलाठी, शेतकरी व ग्रामस्थ उपस्थित होते.