Jalgaon Municipality News : अमृत 2.0 चा विकास आराखडा दुरुस्तीनंतर पुन्हा मंजुरीसाठी

Jalgaon News : अमृत २.० अंतर्गंत शहरातील पाणीपुरवठ्याचा विकास आराखडा तयार झाला आहे. शासनाने काही त्रुटी सूचविल्यानुसार दुरुस्ती करून हा आराखडा आता तयार करण्यात आला आहे. तांत्रिक मंजुरीसाठी नाशिक जीवन प्राधीकरण विभागाकडे पाठविला असून, त्याला मंजुरी मिळाल्यानंतर तो शासनाकडे मंजुरीस पाठविण्यात येणार आहे.

महापालिकेने अमृत २.० अंतर्गत पाणीपुरवठ्याचा डीपीआर तयार केला आहे. एकूण ३५२ कोटी रुपयांचा डीपीआर असून, यात सहा पाण्याच्या टाक्यांचे नवीन काम, ८० हजार नळांना वॉटर मीटर, १० किलोमीटरची नवीन पाइपलाइन, नवीन पंपींग मशिनरी, उमाळापासून ते एमआयडीसीपर्यंतची १५०० मिलिमीटरची मुख्य जलवाहिनी टाकणे.

जलशुद्धीकरण केंद्राची मशिनरी आदी कामांचा समावेश आहे. पाणीपुरवठा योजनेचा विकास आराखडा पुढील २५ वर्षांत वाढणाऱ्या लोकसंख्येचा अंदाज घेऊन तयार केला आहे. जीवन प्राधिकरणाचा नाशिक विभाग व शासनाकडून त्याला मंजुरी मिळाल्यानंतर महापालिकेकडून त्यांची अमंलबजावणी करण्यात येणार आहे. (latest marathi news)

मलनिस्सारण २.० आराखडा तयार

अमृत २.० अंतर्गत मलनिस्सारण योजनेच्या दुसऱ्या टप्प्याच्या विकास आराखड्याचे काम अंतिम टप्प्यात आहे. त्यासाठी शहरातील तीन ठिकाणी जागाही निश्चित केल्या आहेत. मलनिस्सारण योजनेंतर्गंत शहरात सहाशे किलोमीटरची भूमिगत गटारीसाठी पाइपलाइन टाकण्यात येणार आहे. ७५० कोटी रुपयांचा मलनिस्सारण योजनेचा विकास आराखडा तयार करण्यात येत असून, लेआऊट निश्चित झाला आहे. या डीपीआरमध्ये ट्रीटमेंट प्लान्टही आहे. मललिस्सारण योजनेतून येणाऱ्या पाण्यावर प्रक्रिया करून ते पाणी एका प्रकल्पासाठी करार करून देण्यात येणार आहे.

"अमृत २.० पाणीपुरवठा योजनेचा आराखडा दुरुस्तीनंतर पुन्हा जीवन प्राधीकरणाकडे मंजुरीसाठी पाठविला आहे, तर मलनिस्सारण २.० योजनेचा विकास आराखडा तयार करण्याचे काम अंतिम टप्प्यात असून, तोही लवकरच मंजुरीसाठी पाठविण्यात येईल."-योगेश बोरोले, प्रकल्पाधिकारी, महापालिका, जळगाव