Jalgaon News: जळगावच्या कब्रस्थानातून बाळाचा मृतदेह लांबवला; मोकाटकुत्र्यांनी नवजाताचा मृतदेह उकरल्याचा संशय

जळगाव : शहरातील अजिंठा चौकातील मोठ्या कब्रस्तानात एक दिवसापूर्वी पुरलेल्या नवजाताचा मृतदेह लांबवल्याची घटना घडली.

मोकाट कुत्र्यांनी तीन फूट कबर उकरून हा मृतदेह लांबवल्याचा संशय असून मयत मुलाच्या पित्याने पोलिसांत धाव घेतल्यावर एमआयडीसी पोलिसांनी कुणाला आरोपी करावे, या कारणास्तव तक्रार घेतली नसल्याचे पित्याचे म्हणणे असून लेखी अर्ज घेवुन आम्ही तपास करू असे पोलिसांनी सांगितल्याचे मयत नवजाताच्या पित्याने सांगितले. (Jalgaon News Babys body exhumed from Jalgaon graveyard )

जळगाव शहरातील अजिंठा चौकाजवळील मुस्लीम कब्रस्तानात शेख करीम यांच्या कुटुंबीयांनी नवजात बाळाचा मृतदेह शनिवार (ता.३०) रोजी पुरला हेाता. धर्म प्रथेप्रमाणे आज सकाळी करीम शेख यांच्या कुटुंबासह कब्रस्तानात धार्मिक विधीसाठी गेले असता त्यांना अवघ्या अठरा तासांपूर्वी अंत्यविधी केलेली कबर उकरलेली दिसल्यावर ते आक्रोश करू लागले.

चौकशी केल्यावर त्यांना कुठलेही समाधानकारक उत्तर न मिळाल्याने त्यांनी थेट एमआयडीसी पोलिस ठाणे गाठत मृतदेहाचा शोध घ्यावा. तसेच दोषींवर कारवाई व्हावी, यासाठी तक्रार देण्यास विनंती केली. मात्र, एमआयडीसी पोलिसांनी तक्रार घेण्यास नकार दिल्याचे त्यांनी सांगितले.

दरम्यान, तक्रारी अर्ज घेतल्यावर पोलिसांनी घटनास्थळी पाहणी केल्यावर पुनश्च कबर उकरण्यात आली. मात्र, त्यात कुठेही कफन, रक्ताचे डाग असे काहीच आढळून आले नाही. परिणामी कुटुंबीयांचा अधिकच संशय बळावला.

"आज सकाळी दहा वाजता मी कबरीवर वाहण्यासाठी फुलं आणि पाणी घेवुन प्रार्थनेसाठी पोचलो. आदल्या दिवशी दफन केलेल्या माझ्या बाळाची कबर उकरून त्यातील मृतदेह कुणीतरी लांबवला असल्याचे निदर्शनास आले. माझ्या कुटुंबीयांनी तत्काळ कब्रस्तान ट्रस्टच्या पदाधिकाऱ्यांना फोन केला. मात्र, त्यांचाही काही प्रतिसाद आला नाही. कब्रस्तानातील सेवेकरी शब्बीर शहा आणि अनिस शहा यांनी कुत्र्यांनी मृतदेह लांबवल्याची शक्यता असल्याचे आम्हाला सांगितले. माझ्या मुलाच्या मृतदेहाचा शोध घेवुन संबंधितांवर कारवाई करावी."

- करीम शेख ताज मोहम्मद (मृत बाळाचे वडील)