Jalgaon News : नापिकाला कंटाळून शेतकऱ्याने उचलले टोकाचे पाऊल

Jalgaon News : सततच्या नापिकीला कंटाळून येथील ४१ वर्षीय शेतकऱ्याने स्वतःच्या घरात गळफास घेऊन आत्महत्या केल्याची घटना रविवारी (ता.१८) घडली. याबाबत माहिती अशी, येथील रहिवासी वाल्मीक पोपट पाटील यांची तीन एकर कोरडवाहू शेती आहे. गेल्या तीन वर्षांपासून त्यांना शेतातून अपेक्षित उत्पन्नच मिळत नसल्याने ते प्रचंड आर्थिक विवंचनेत होते. (farmer took extreme steps)

सततच्या नापिकीमुळे त्यांच्यावर बॅंकांसह बचत गटांचे कर्ज झाले होते. शेतात राबराब राबूनही निसर्गाच्या लहरीपणामुळे उत्पन्नच मिळत नसल्याने ते हताश झाले होते. परिस्थिती बदलेल म्हणून त्यांच्या कुटुंबीयांकडून त्यांची सतत समजूतही घातली जात होती.

अखेर रविवारी (ता. १८) दुपारी तीनच्या पूर्वी घरी कोणी नसताना वाल्मीक पाटील यांनी घरातील लोखंडी ॲंगलला दोरीने गळफास घेऊन आत्महत्या केली.

काही वेळानंतर त्यांची मुलगी घरी आली असता, तिला वडिलांनी आत्महत्या केल्याचे लक्षात आले. तिने तत्काळ तिचे काका समाधान पाटील यांना सांगितल्यानंतर ते धावत कुटुंबासह घरी आले.

या घटनेची माहिती पोलिसांना दिल्यानंतर पोलिसांनी घटनास्थळी येऊन पंचनामा केला. वाल्मीक पाटील यांच्यावर आज दुपारी अंत्यसंस्कार करण्यात आले. पोलिसात आकस्मिक मृत्यूची नोंद करण्यात आली असून हवालदार नरवाडे तपास करीत आहेत.