Jalgaon Kharif Season : अनेर धरणाच्या पाण्यावर 5 हजार एकरवर खरीपपूर्व कपाशीची लागवड

Jalgaon Kharif Season : अनेर मध्यम प्रकल्पाच्या डाव्या व उजव्या कालव्यांतून गेल्या महिन्यापासून पाणी सोडले आहे. या पाण्यामुळे चोपडा व शिरपूर या दोन्ही तालुक्यांतील अनेक शिवारात खरीपपूर्व कपाशीची लागवड झाली आहे. हे पीक आता डोलू लागले आहे. धरणाच्या पाण्यावर किमान पाच हजार एकरवर कपाशीची लागवड झाली आहे. अनेर मध्यम प्रकल्पाचा उजवा कालवा लांब आहे. (Plantation of pre kharif cotton on 5 thousand acres )

तो शिरपूर तालुक्यातील हिसाळे, तोंदे, तरडी, बभळाज, पिळोदा, मांजरोद, पिळोदा, भोरटेक भावेर, होळनांथे आदी शिवारांतील जमिनीला पाणीपुरवठा करतो. खोल व लांब असलेल्या कालव्यामुळे बरीच शेती बागायती झाली आहे. मोठ्या प्रमाणात पाणी उपलब्ध होत आहे. त्यामुळे शेतकऱ्यांनी या भागात खरीपपूर्व कपाशीची लागवड १५ ते २० दिवसांत पूर्ण केली आहे. त्यामुळे या भागातील कपाशी कोळपणी व निंदणीवर आली आहे. (latest marathi news)

डाव्या कालव्यातून लासूर, गणपूर, मराठे, शिकावल आदी शिवारात सुमारे सातशे ते आठशे एकर खरीपपूर्व कपाशीची लागवड झाली आहे. आता पाणी कालव्यातून वापरले जात आहे. उर्वरित पाणी ड्रेनेजमधून नाल्यांमध्ये जात आहे. अनेर प्रकल्पाच्या पाण्यामुळे शेतकऱ्यांना मृग नक्षत्राअगोदरच कपाशी लागवड करणे शक्य झाले आहे. त्यामुळे जमीन पुन्हा हिरवी होण्यास मदत झाली आहे.