Jalgaon Police Recruitment : पोलिस भरतीच्या नव्या अटीमुळे अडचण; भरतीसाठी डॉक्टर, एमबीए उमेदवारांचे अर्ज

Jalgaon Police Recruitment : बेरोजगारीमुळे सरकारी नोकरी मिळत नाही म्हणून पोलिस भरतीसाठी चक्क डॉक्टर, इंजिनिअर, एमबीए, वकील, एमएस्सी, बी-टेक, बीबीएचे शिक्षण घेतलेले उच्च शिक्षितांचे अर्ज आले आहेत. राज्यभरातून पोलिस भरतीसाठी १७ हजार ४७१ पदांसाठी तब्बल १७ लाख ७६ उमेदवारांचे अर्ज आले आहेत. मात्र यात प्रशासनाने पोलिस भरतीसाठी एक जिल्ह्यात एकच अर्ज करता येणार आहे. ()

असा नवीन नियम आणला आहे. हा नियम उमेदवारांसाठी अडचणीचा ठरणार आहे. राज्यात वेगवेगळ्या जिल्ह्यांत भरतीसाठी अर्ज भरल्याचे प्रशासनाच्या लक्षात आल्यानंतर गृह विभागाकडून हा निर्णय घेण्यात आला आहे. राज्यात पोलिस भरतीची प्रक्रिया सुरु आहे. पोलिस भरतीसाठी तर चक्क डॉक्टर, इंजिनिअर, एमबीए, वकील, एमएस्सी, बी-टेक, बीबीएचे शिक्षण घेतलेले उच्चशिक्षितांचे अर्ज आले आहेत.

या प्रक्रियेत अनेकांनी वेगवेगळ्या जिल्ह्यासाठी अर्ज केले आहेत. परंतु आता त्यांना एकाच जिल्ह्यासाठी अर्ज करता येणार आहे. त्यासाठी हमीपत्र द्यावे लागणार आहे. उमेदवारांनी वेगवेगळ्या ठिकाणी अर्ज केल्यामुळे भरती प्रक्रियेनंतर काही जागा रिक्त राहतात. कारण एका उमेदवाराची दोन जिल्ह्यात निवड झाल्यास तो सोयीचा जिल्हा निवडतो. परंतु दुसऱ्या जिल्ह्यातील जागा रिक्त राहते. यामुळे विद्यार्थ्यांचे नुकसान होते. (latest marathi news)

प्रशासनाच्या लक्षात ही बाब आल्यामुळे एकाच जिल्ह्यातून भरती प्रक्रियेत सहभागी होण्याची अट करण्यात आली आहे. ज्या उमेदवारांनी एकापेक्षा जास्त जिल्ह्यात अर्ज केले आहेत, त्यांना हमीपत्र द्यावे लागणार आहे. एकापेक्षा जास्त जिल्ह्यात केलेले अर्ज नियमबाह्य ठरवण्यात येणार आहे. विशेष पोलिस महानिरीक्षक प्रवीणकुमार पडवळ यांनी याबाबत आदेश जारी केली आहे.

त्यामुळे उमेदवारांनी त्यांच्या वास्तव्याच्या जिल्ह्यातील पोलिस कार्यालयात १७ मे २०२४ पर्यंत हे हमीपत्र देणे आवश्यक आहे. आता उमेदवाराच्या केवळ एकाच अर्जाला प्राधान्य दिले जाईल. हमीपत्रात उमेदवाराने कोणत्या पदासाठी अर्ज केला आहे त्याचा तपशील द्यावा लागणार आहे. तसेच त्याने किती अर्ज केले आहेत आणि ते कुठे कुठे केले ही माहिती द्यावी लागणार आहे. तसेच एका पदासाठी केवळ एका अर्जालाच प्राधान्य देण्याची हमी त्यास द्यावी लागणार आहे.