Jalgaon Lok Sabha Election: 4 जूनला अगोदर टपाली मोजणी! जळगाव, रावेर लोकसभेच्या मतमोजणीसाठी यंत्रणा सज्ज; पोलिस बंदोबस्त राहणार

Jalgaon Lok Sabha Election : जळगाव आणि रावेर लोकसभा निवडणुकीसाठी १३ मेस झालेल्या मतदानानंतर ४ जूनला मतमोजणी होणार आहे. या प्रक्रियेची पारदर्शक, कार्यक्षम तयारी जिल्हा प्रशासनाने केली आहे, अशी माहिती माहिती जिल्हा निवडणूक अधिकारी आयुष प्रसाद यांनी दिली. (Jalgaon Lok Sabha Election 2024 Postal counting before June 4)

जळगाव आणि रावेर लोकसभा मतदारसंघात प्रत्येकी सहा विधानसभा मतदारसंघ आहेत. त्या प्रत्येक विधानसभानिहाय १४ मतमोजणी टेबल असतील. एका टेबलवर १ मतमोजणी प्रतिनिधी प्रत्येक उमेदवाराला नियुक्त करता येईल. तसे उमेदवारांना लेखी कळविले आहे. निवडणूक प्रशासनाकडून प्रत्येक टेबलसाठी एका सूक्ष्म निरीक्षकाची नियुक्ती करण्यात आली आहे.

टपाली मतमोजणी १८ टेबलांवर

टपाली मतमोजणीसाठी जळगावसाठी १० आणि रावेरसाठी ८ टेबल ठेवले असून, तिथेही प्रत्येक टेबलनिहाय १ याप्रमाणे मतमोजणी प्रतिनिधी असतील. उमेदवारांनी नियुक्त केलेले प्रतिनिधी आपापल्या ओळखपत्रासह सकाळी सातला मतमोजणीच्या ठिकाणी उपस्थिती राहतील. (latest marathi news)

मतमोजणी अधिकाऱ्यांना प्रशिक्षण

मतमोजणी प्रक्रिया सुरळीत पार पडावी, यासाठी रिटर्निंग ऑफिसर पुरेशा संख्येने मोजणी अधिकाऱ्यांची नियुक्ती करतील. यात राखीव जागा असतील. या अधिकाऱ्यांना आवश्यक कौशल्ये आणि ज्ञानाने सुसज्ज करण्यासाठी सखोल प्रशिक्षण सत्रे आयोजित करण्यात आली आहेत. मतमोजणीच्या दिवशी, अधिकारी पहाटे साडेपाचपर्यंत केंद्रावर पोहोचतील. त्यांचे फोटो ओळखपत्र घेऊन जातील आणि आरओ आणि एआरओच्या निर्देशांचे काटेकोरपणे पालन करतील.

पोस्टल मतमोजणी अगोदर

ईव्हीएम मतदानापूर्वी पोस्टल मतपत्रिकांची मोजणी सुरू होईल. मतपत्रिका मतमोजणी व्यवस्थापनासाठी अतिरिक्त निवडणूक अधिकारी नियुक्त केले आहेत. यात सहाय्यक निवडणूक निर्णय अधिकारी (एआरओ), एक मतमोजणी पर्यवेक्षक, दोन मतमोजणी सहाय्यक आणि एक सूक्ष्म निरीक्षक यांचा समावेश आहे. मतमोजणीच्या ठिकाणी चोख पोलिस बंदोबस्त ठेवला असून, पारदर्शकतेसाठी या प्रक्रियेची संपूर्ण व्हिडिओग्राफी केली जाणार आहे.