Jalgaon News: पुणे विद्यापीठाच्या कुलगुरूंच्या पुतण्याने उचलले टोकाचे पाऊल; विधवा आईच्या वृद्धापकाळाचा आधार हिरावल्याने हळहळ

Jalgaon News : धामणगाव (ता. जळगाव) येथे एका २२ वर्षीय तरुणाने बुधवारी (ता. ७) दुपारी राहत्या घराच्या छताला गळफास घेऊन आत्महत्या केली. पीयूष रमेश गोसावी, असे मृत तरुणाचे नाव आहे. पुण्यातील सावित्रीबाई फुले विद्यापीठाचे कुलगुरू प्रा. सुरेश गोसावी यांचा तो पुतण्या आहे. (SPPU Vice Chancellor Nephew Takes Extreme Step)

धामणगाव येथे पीयूष रमेश गोसावी आई, आजी-आजोबा यांच्यासह वास्तव्यास होता. त्याच्या वडिलांचे काही वर्षांपूर्वी निधन झाले आहे. पीयूष गोसावी शेतीकाम करून उदरनिर्वाह करीत होता. बुधवारी दुपारी तो घरी आला. त्यावेळी त्याची आजी ओट्यावर बसली होती. पीयूषने घरात जाऊन छताला गळफास घेऊन आत्महत्या केली.

थोड्या वेळाने आजी घरात आल्यावर तिला ही घटना समजली. ममुराबाद गावातील बँकेत गेलेली त्याची आईही घरी परतली. वृद्धापकाळाचा एकमेव सहारा असलेल्या पीयूषने गळफास घेतल्याचे पाहून आईने आक्रोश करत हंबरडा फोडला. ग्रामस्थांनी दिलेल्या माहितीवरून तालुका पोलिसांनी घटनास्थळी धाव घेतली. (latest marathi news)

पोलिसांनी पीयूषचा मृतदेह शासकीय वैद्यकीय महाविद्यालय व रुग्णालयात दाखल केला. तेथे तपासणी करून वैद्यकीय अधिकारी डॉ. अश्विन देवरे यांनी त्यास मृत घोषित केले. या वेळी नातेवाईक, ग्रामस्थासह कुटुंबीयांना अश्रू अनावर झाले होते. याबाबत तालुका पोलिस ठाण्यात आकस्मिक मृत्यूची नोंद झाली. आत्महत्येचे कारण कळू शकले नाही.