SAKAL Impact News : पहूर कसबे येथे अखेर स्मशानभूमीतील सांत्वन शेडचे काम सुरू

पहूर (ता. जामनेर) : पहूर कसबे येथील हिंदू स्मशानभूमीतील रखडलेले सांत्वन शेडचे काम ग्रामपंचायत सदस्य विक्रम पंडित घोंगडे यांच्या नेतृत्वाखाली पुकारल्या गेलेल्या भिख मांगो आंदोलनानंतर अखेर सुरू झाले असून, लवकरच ते पूर्णत्वास येणार असल्याची माहिती त्यांनी दिली. याविषयी 'सकाळ'ने वाचा फोडून शासन व प्रशासनाचे लक्ष वेधले होते. (work of consolation shed in cemetery at Pahoor Kasbe started)

पहूर कसबे येथे वाघूर नदीच्या तीरावर स्मशानभूमी असून, या स्मशानभूमीत अंत्यसंस्कारासाठी आलेल्या शोकाकुल नातेवाईक तसेच आप्तस्वकियांना बसण्यासाठी १५ व्या वित्त आयोगातून जिल्हा परिषदेमार्फत ७ लाख रुपये निधीचे सांत्वन शेड मंजूर झालेले आहे. परंतु हे काम अर्धवट स्थितीत रखडल्याने पहूर कसबे ग्रामपंचायतीचे सदस्य विक्रम पंडित घोंगडे यांनी भिख मांगो आंदोलन पुकारले होते.

या आंदोलनाची दखल घेत अखेर जामनेर सार्वजनिक बांधकाम विभागाचे उपविभागीय अधिकारी प्रकाश पवार यांनी संबंधित ठेकेदार व संबंधित वरिष्ठ अधिकाऱ्यांशी याविषयी लेखी स्वरूपात पत्रव्यवहार करून ठेकेदारास हे काम महिनाभरात पूर्ण करण्याचे आदेश दिलेले होते. तथापि एका महिन्यात काम पूर्ण झाले नसले तरी सुरवात मात्र झालेली आहे. लवकरच हे काम पूर्ण होऊन शोकाकुल नातेवाईक, आप्तांना दिलासा मिळणार असल्याचे आंदोलक विक्रम घोंगडे यांनी बोलताना सांगितले.