Jalgaon Accident News: महामार्गावरील उभ्या ट्रकवर भरधाव टँकर आदळून दोन ठार! वरणगावजवळील घटना; गुन्हा दाखल

वरणगाव (ता. भुसावळ) : शहरालगत नवीन राष्ट्रीय महामार्गावर पहिलवान ढाब्याजवळ नादुरुस्त ट्रकवर मागून भरधाव टँकर आदळल्याने दोन्ही वाहनचालक ठार झाले. ही घटना गुरुवारी (ता. ११) रात्री दीडच्या सुमारास घडली. (Jalgaon Two killed when tanker collided with standing truck)

भुसावळकडून मुक्ताईनगरकडे जाणारा ट्रक (सीजी ०४, जेडी ०५१७) नादुरुस्त झाल्याने गुरुवारी रात्री महामार्गावर उभा होता. नादुरुस्त ट्रकला बघण्यासाठी चालक नदीम नसीम खान (रा. नागपूर) ट्रक खाली उतरला. त्याचवेळी मागून १२ चाकी टँकर (एमएच ४१, एयू ४६४६)चालक कुंभकरण (रा. अमेठी, उत्तर प्रदेश) याने मागून ट्रकला जोरदार धडक दिली.

या धडकेत टँकरच्या केबिनचा अक्षरश: चुराडा झाला असून, चालक कुंभकरण अडकला होता, तर नादुरुस्त ट्रकखाली असलेला नदीम नसीम खान दाबला गेला. दोघांना बाहेर काढून वरणगाव ग्रामीण रुग्णालयात दाखल केले असता, वैद्यकीय अधिकाऱ्यांनी मृत घोषित केले. याबाबत पोलिस कर्मचारी सुकराम सावकारे यांनी दिलेल्या फिर्यादीवरून वरणगाव पोलिसांत टँकरचालक कुंभकरण याच्याविरोधात गुन्हा दाखल झाला आहे. वरणगाव पोलिस तपास करीत आहेत.