चाळीसगावातील मुख्य रस्ता दुरुस्तीचे काम सुरू; नागरिकांना दिलासा

चाळीसगाव (जि. जळगाव) : शहरातील हॉटेल दयानंद ते खरजई नाक्यासह प्रमुख रस्त्यांच्या दुरुस्तीला आमदार मंगेश चव्हाण यांनी बुधवारपासून सुरूवात केली आहे. लवकरच तालुक्याच्या विकासकामांसाठी २० कोटींचा निधी मंजूर करून आणणार असल्याचे आमदार चव्हाण यांनी सांगितले. (Latest Marathi News)

शहरातील प्रभाग क्रमांक तीनमधील हॉटेल दयानंद ते खरजई नाक्यापर्यंत भुयारी गटारींमुळे रस्त्यांची मोठ्या प्रमाणात दुरवस्था झाली होती. याबाबत नागरिकांना मनस्ताप सहन करावा लागत होता. आमदार चव्हाण यांना ही गंभीर बाब लक्षात येताच त्यांनी हॉटेल दयानंद ते खरजई नाकासह प्रमुख रस्त्याची मुरूम व खडी टाकून स्वखर्चाने दुरूस्ती सुरू केली आहे. तत्पूर्वी राज्यात सत्ता बदल झाल्याने शहरासाठी भरीव निधी आणण्यासाठी आमदार मंगेश चव्हाण यांनी प्रयत्न सुरू केले आहे. लवकरच तालुक्याच्या विविध विकासकामांसाठी २० कोटींचा निधी मंजूर करून आणणार असल्याचे आमदार चव्हाण यांनी ‘सकाळ'शी बोलताना व्यक्त केले आहे.

त्यापैकी पहिल्या टप्प्यात ५ कोटींचा निधी उपलब्ध होणार असून, लवकरच कामास प्रारंभ होणार असल्याचेही त्यांनी या वेळी सांगितले आहे. या आधीही त्यांनी स्वखर्चाने शहरातील स्टेशन रोड, गणेश रोड, करगाव रोड दुरुस्ती केली होती. तसेच पावसाळा संपल्यानंतर आमदार निधी व नगरपालिका निधीतून रस्त्यांचे डांबरीकरण देखील केले होते.

कामाच्या उदघाटनप्रसंगी आमदार चव्हाण यांच्यासह ज्येष्ठ नगरसेवक राजेंद्र चौधरी, भाजप शहराध्यक्ष घृष्णेश्वर पाटील, नगरपालिका गटनेते संजय पाटील, युवा मोर्चा प्रदेश उपाध्यक्ष कपिल पाटील, नगरसेवक नितीन पाटील, चंद्रकांत तायडे, माजी नगरसेवक प्रभाकर चौधरी, भास्कर पाटील, सदानंद चौधरी, रणजीत पाटील, हर्षल चौधरी, जितेंद्र वाघ, योगेश खंडेलवाल, कैलास नाना पाटील, अभय वाघ, देवा गांगुर्डे, मनोज गोसावी, बंडू पगार, अग्गा सय्यद, अकलाक खाटिक, धीरज पवार, मयूर घोरपडे, विकी देशमुख, विपुल पाटील यांच्यासह प्रभाग क्रमांक तीनमधील नागरिक मोठ्या संख्येने उपस्थित होते.