दंड भरू पण मास्‍क नाही वापरणार..म्‍हणूनच दोन दिवसात दीड लाखाचा दंड

कळमसरे (जळगाव)  : सद्यस्थितीत राज्यात सर्वत्र कोरोनाच्या रुग्ण संख्येत वाढ होत असताना जिल्हाधिकारी अभिजित राऊत यांनी जिल्ह्यात सतर्कतेचा इशारा दिला आहे. त्‍यानुसार अंमलबजावणीसाठी अमळनेर पोलीस ठाण्याचे पोलीस निरीक्षक अंबादास मोरे आणि त्यांचे टीमने व नगरपालिका प्रशासनाने शहरात विना मास्क वाल्यांवर कारवाईचा बडगा सुरू केला असून, विनामास्‍क फिरणाऱ्यांकडून दंड वसूल केला जात असून, दोनच दिवसात दीड लाखाचा दंड वसूल करण्यात आला आहे.
 

असा केला दंड वसूल
कोरोनाच्या पार्श्वभुमीवर दंड आकारणीस सुरवात झाली आहे. केवळ अमळनेर शहरातून दीड लाखाचा दंड वसूल झाला आहे. यात रविवारी (ता.21) अन्नपूर्णा मंगल कार्यालयास 21 हजार दंड आणि 90 जणांवर कारवाई करून 21 हजार 100 दंड असा ऐकवून 42 हजार 100 रूपयांचा दंड पोलीस प्रशासनाने केला. तर नगरपालिका प्रशासनानेही शहरातील वाणी मंगलकार्यालय, बंशीलाल पॅलेस यांच्यावर प्रत्येकी अकरा हजार आणि विनामास्क वाल्यांकडून सहा हजार पाचशे असा एकूण 28 हजार 500 रूपये दंड केला. तर सोमवारी (ता.22) अमळनेर पो.स्टे. हद्दीत सिद्धिविनायक मंगलकार्यालयावर दंड आणि दोन लग्न मिरवणुक कारवाई करून एकूण 53 हजार रुपये दंड करण्यात आला. त्‍याचप्रमाणे एकूण 71 केसेस करून 24 हजार 100 दंड असा एकूण 77 हजार 100 रूपये. असे दोन दिवसात सुमारे दीड लाखाचा दंड वसूल करण्यात आला.

तरी देखील फिरताय बिनधास्‍त
पोलीस व नगरपालिका प्रशासनाने शहरातील मंगलकार्यालयांवर व विना मास्क वाल्यांकडून दोन दिवसात सुमारे दीड लाख दंड वसूल केला. मात्र यामुळे कोरोना काळात विना मास्क लावून फिरणाऱ्यांना चपराक बसल्याने स्वयंशिस्तीचे पालन व जागरूकता झाल्याने दिवसभर आज चर्चा होती. तरी काही जण अगदी बिनधास्‍तपणे फिरताना दिसून येत आहेत.

संपादन ः राजेश सोनवणे