बँकेबाहेर होतेय ग्राहकांची तोबा गर्दी; एटीएम बंदचा परिणाम

भुसावळ (जळगाव) : शहरातील विविध बॅंकाच्या प्रवेशद्वाराबाहेर महिलांसह ज्येष्ठ नागरिकांनी बँकेचे व्यवहार करण्यासाठी मोठ्या प्रमाणात गर्दी केली होती. यावेळी कोरोना नियमाची पायमल्ली होताना दिसून येत आहे. (Coronavirus jalgaon lockdown bank people crowd ATM close)

कोरोना दुसऱ्या लाटेच्या (Coronavirus) पार्श्‍वभूमीवर शासनाने कडक निर्बंध लादले आहे, 31 मे पर्यंतचा लॉकडाऊन (Jalgaon bhusawal lockdown) पुढे 15 जूनपर्यंत वाढविण्यात आला आहे. तालुक्यासह जिल्ह्यामध्ये कोरोना रुग्णाची संख्या जरी कमी होत असली तरी तिसऱी लाट येणार हे गृहीत धरून कडक निर्बंध लादण्यात आले आहे, मात्र भुसावळ शहरांमध्ये अनेक बँकाच्या प्रवेशद्वारा समोर दैनंदिन व्यवहार चालावे याकरिता महिलांसह जेष्ठ नागरिक बँकेच्या बाहेर मोठ्या प्रमाणात गर्दी करताना दिसून येत आहे यामुळे पूर्णता कोरोना नियमाची पायमल्ली होताना दिसून येत आहे.

एटीएम बंद नागरिकांची फिराफिर

जिल्हा निर्मितीकडे वाटचाल करणाऱ्या शहरात लोकसंख्येच्या मानाने फारच कमी एटीएम सुरू आहे, उपलब्ध आहे त्यातही 70 टक्के एटीएम फक्त नावापुरता सुरू असून प्रत्यक्षात एटीएम वर गेल्यावर तांत्रिक कारणामुळे, बिघाडामुळे, मशीन बंद असल्या कारणाने अशा अनेक कारणांचे फलक एटीएमचे प्रवेशद्वार लावल्याचे दिसून येत आहे. तर काही बोटावर मोजण्या इतकेच एटीएम सुरू असून त्यातही काही तासातच रक्कम संपून जाते. यामुळे नागरिकांची मोठ्या प्रमाणात गैरसोय होत असून, असह्य उन्हात नागरिकांची फिरफिर होत असतानाचे चित्र दिसून येत आहे. प्रत्येक बँकेच्या व्यवस्थापनाने आपापले एटीएमची दुरुस्ती करून तांत्रिक अडचणी दूर करून, नागरिकांची गैरसोय दूर करावी अशी अपेक्षा व्यक्त करण्यात येत आहे.