शेतकऱ्यांना नुकसानीची सरसकट मदत द्या : देवेंद्र फडणवीस

जळगाव : पावसामुळे सर्व उघड्यावर पडले आहे. मागच्या नुकसानीचेच पैसे आणि पिक विम्‍याची मदत देखील शेतकऱ्यांना मिळालेली नाही. विमा कंपनी देखील येत नसल्‍याचे शेतकऱ्यांकडून सांगण्यात येत असून यामुळे शेतकऱ्यांनी विमाच (Farmer crop insurance) काढला नसल्‍याची स्‍थिती आहे. यामुळे शेतकऱ्यांना अडचण येवू नये; या दृष्‍टीने शेतकऱ्यास तात्‍काळ नुकसान भरापाई मिळावी; अशी मागणी सरकारकडे करणार असल्‍याची माहिती विरोधी पक्षनेते देवेंद्र फडणवीस यांनी केली. (jalgaon-news-farmer-Devendra-Fadnavis-help-to-farmers-for-loss)

मुक्ताईनगर व रावेर वादळी पावसाने झालेल्या नुकसानीची पाहणी करण्यासाठी देवेंद्र फडणवीस (Leader of Opposition Devendra Fadnavis) हे जळगाव जिल्‍ह्‍याच्या दौऱ्यावर आले होते. नुकसानीची पाहणी झाल्‍यानंतर त्यांनी नायगाव येथे आयोजित पत्रकार परिषदेत सदरची माहिती दिली.

विरोधी पक्षनेते फडणवीस म्‍हणाले, की केळी बागाचे शंभर टक्‍के नुकसान झालेले आहे. शेतकऱ्यांशी चर्चा केली असता त्‍यांना नुकसान भरपाईच मिळालेली नाही. मुळात शेताची सफाई करावी लागणार आहे. त्‍यासाठीची सुरवातीला मदत करावी. तसेच अनेक ठिकाणी घरांचे देखील नुकसान झाले असून असा संपुर्ण नुकसानीचा अहवाल राज्‍य सरकारकडे सादर करून शेतकऱ्यांना सरसकट मदत करण्याची मागणी फडणवीस यांनी यावेळी केली आहे. तसेच मागील वर्षी हरिभाऊ जावळे समितीचे सर्व निकष बदलवण्यात आले आणि नव्या निकषाने केळीच्या विम्याचा हा टेंडर काढला गेला. त्यामुळे विमा कंपन्यांचा आता अधिक फायदा होत आहे. परंतु, हरिभाऊ जावळे समितीचे जे निकष होते, त्या निकषानुसारच केळीचा विमा उतरवला गेला पाहिजे आणि शेतकऱ्याला मदत मिळाली पाहिजे असे फडणवीस म्हणाले.

त्‍यांनी केलेली मागणी आता पुर्ण करावी

यापुर्वी म्‍हणजे २०१९ मध्ये झालेल्‍या अतिवृष्‍टीमध्ये देखील खुप मोठ्या प्रमाणात नुकसान झाले होते. त्‍यावेळी आताचे मुख्यमंत्री असलेले उद्धव ठाकरे यांनी ५० हजाराची आणि उपमुख्यमंत्री अजित पवार यांनी एक लाखाची मदत करण्याची मागणी त्‍यावेळी केली होती. यामुळे आताच्या नुकसानीबाबत आम्‍ही कोणत्‍याही प्रकारची मागणी करणार नसून केवळ त्‍यांनी केलेली मागणी आता पुर्ण करावी.