३० वर्षांवरील नागरिकांनाही लसीकरण

जळगाव : शहरात शनिवारपासून ३० ते ४४ वयोगटांतील नागरिकांना कोरोना प्रतिबंधक लसीकरणास (Corona vaccination) सुरवात झाली. शहरातील आठही केंद्रांवर शनिवारी सकाळपासूनच लस घेण्यासाठी रांगा लागल्याचे दिसून आले. महिन्याभरापासून लशींचा पुरेसा साठा नसल्याने केवळ ४५ वरील नागरिकांना पहिला व दुसरा डोस दिला जात होता. अनेकांनी लस घेतल्याने सर्वच केंद्रांवर शुकशुकाट होता. आजपासून लस उपलब्ध झाल्याने पुन्हा लसीकरण केंद्रे गजबजू लागली आहेत. (jalgaon-news-Queue-again-at-corona-vaccination-centers)

पूर्वी ऑनलाइन नोंदणीची अट होती. आता आधारकार्ड लसीकरण केंद्रावर (Corona vaccination center) दाखवून नोंदणी होते. नंतर लसीकरण केले जाते. पूर्वीही १८ ते ४४ वयेागटांसाठी केंद्रावर जाण्यापूर्वी ऑनलाइन नोंदणी करावी लागत होती. यामुळे शहरातील केंद्राचे स्लॉट मिळताच काही मिनिटांत नोंदणी फुल होत असे. आता लशींची उपलब्धता झाल्याने ३० ते ४४ वयोगटांतील लसीकरण सुरू झाले आहे. आजअखेरपर्यंत एकूण पाच लाख ९८ हजार ८३ नागरिकांनी कोरोना प्रतिबंधक लस घेतली आहे

२८ हजार लसींचा साठा शिल्‍लक

शहरातील इंडियन रेडक्रॉस सोसायटी, छत्रपती शाहू महाराज रुग्णालय, डी. बी. जैन हॉस्पिटल (शिवाजीनगर), कुंभारवाड्यातील शाहीर अमर शेख हॉस्पिटल, नानीबाई अग्रवाल हॉस्पिटल, मनपा शाळा क्रमांक १८, काशीबाई उखाजी कोल्हे विद्यालय या केंद्रांवर कोव्हिशील्ड लसीकरण सुरू झाले. लशींच्या उपलब्धतेनुसार लसीकरण केंद्र सुरू राहणार आहेत. जिल्ह्यात कोव्हिशील्ड लशीचा साठा २७ हजार ९७०, तर कोव्हॅक्सिन लशींचा साठा ३६० शिल्लक आहे.

आजपासून कुपन देणार

रेडक्रॉस सोसायटी लसीकरण केंद्र, काशीबाई उखाजी कोल्हे विद्यालयासह इतर केंद्रांवर लसीकरणासाठी गर्दी झाल्याने रविवार (ता. २०)पासून रेडक्रॉस सोसायटीच्या केंद्रावर सकाळी आठला लसीकरणाचे कुपन देऊन त्यांना वेळ दिली जाईल. त्यावेळेत त्यांनी येऊन लसीकरण करावे, असे आवाहन रेडक्रॉसचे विनोद बियाणी यांनी केले आहे.

शासनाकडून लशीचा पुरवठा होऊन ३० ते ४० वयोगटांतील नागरिकांना लस देण्याच्या सूचना आहेत. यामुळे शहरात लसीकरण सुरू झाले. जसजसा लशींचा पुरवठा होईल. तसतसा जिल्ह्यातील केंद्रांवर या वयोगटांतील नागरिकांना लस दिली जाईल.

-डॉ. एन. एस. चव्हाण, जिल्हा शल्यचिकित्सक