जळगाव जिल्ह्यातील सक्रिय रुग्णसंख्या पुन्हा तीसच्या आत

जळगाव : गेल्या दोन-अडीच महिन्यांपासून सातत्याने घटत जाणाऱ्या नव्या रुग्णांच्या संख्येमुळे जिल्ह्यातील (Corona) सक्रिय रुग्णसंख्या घटली होती. गेल्या आठवड्यात बोदवड तालुक्यात वाढलेल्या रुग्णांमुळे सक्रिय रुग्णांमध्ये (corona active Patient) वाढ झाली होती. परंतु आता रुग्ण पुन्हा कमी होऊन वीसच्या आत संख्या मर्यादित राहिली आहे.

जळगाव जिल्ह्यात दररोज आढळून येणाऱ्या नव्या रुग्णांची संख्या चार- पाच पेक्षा जास्त नाही. दोन महिन्यांपासून हा ट्रेंड असल्याने सक्रिय रुग्णही कमी झाले आहेत. गेल्या आठवड्यात बोदवड तालुक्यात तीन- चार दिवसांतच नवीन दहा- बारा रुग्ण समोर आले. सध्या या तालुक्यातही स्थिती नियंत्रणात असून १२ रुग्णांवर उपचार सुरु आहेत. उर्वरित अन्य सर्व तालुक्यांमध्ये सक्रिय रुग्ण एक- दोनच्या संख्येत आहेत.

बरे होण्याचे प्रमाण ९८ टक्के

जिल्हाभरात आता अवघे २६ सक्रिय रुग्ण असून पैकी २ ऑक्सिजनवर व ३ आयसीयूत आहेत. रविवारी ३ हजार २७ चाचण्यांचे अहवाल प्राप्त झालेत. पैकी पाचोरा १, चाळीसगाव २ व भडगाव तालुक्यात १ असे ४ रुग्ण आढळून आलेत. तर ६ रुग्ण दिवसभरात बरे झाले. आतापर्यंत आढळून आलेल्या रुग्णांची संख्‌या १ लाख ४२ हजार ६८२ आहे, तर बरे झालेल्यांचा आकडा १ लाख ४० हजार ८१वर पोचला आहे. बरे होण्याचे प्रमाण ९८.१८ टक्के झाले असून हा दर राज्यातील रिकव्हरी दरापेक्षा अधिक आहे.