नगरसेवक गेल्याचा भाजपला नव्हे खडसेंना धक्का-गिरीश महाजन

जळगाव : बोदवड, मुक्ताईनगर येथील भाजप (BJP) नगरसेवक शिवसेनेत (Shiv Sena) गेले, ते मुळातच भाजपचे नव्हे तर खडसे (Eknath Khadse)समर्थक होते. त्यामुळे हा खडसे यांनाच खऱ्या अर्थाने धक्का असल्याचे मत भारतीय जनता पक्षाचे नेते आमदार गिरीश महाजन (MLA Girish Mahajan) यांनी पत्रकारांशी बोलताना व्यक्त केले.

मुक्ताईनगर व बोदवड येथील भाजपच्या १४ नगरसेवकांनी शिवसेनेत प्रवेश केला. त्यावर प्रतिक्रिया व्यक्त करताना आमदार गिरीश महाजन म्हणाले, भारतीय जनता पक्षाला कुठलाही धक्का नाही, हे गेलेले नगरसेवक एकनाथ खडसे यांचे समर्थक होते. खडसे यांचीच ती माणसे होती, खरे तर ती राष्ट्रवादी काँग्रेस पक्षात जाणे अपेक्षित होती. मात्र कुणीही राष्ट्रवादी काँग्रेस पक्षात गेले नाही, मुक्ताईनगरात भारतीय जनता पक्षाचा नगराध्यक्ष आहे. खडसे यांच्या कोथळी गावात त्यांचा सरपंच नाही. आज बोदवड येथेही तीच परिस्थिती आहे.

निवडून आलेली माणसे त्यांची होती

आता निवडणुका लागतील त्या वेळी आम्ही दाखवू भाजप तिथे काय आहे ते, गेल्या तीस वर्षांपासून खडसे तिथे भाजपचे आमदार होते, पक्षाने त्यांना मंत्री केले होते. लाल दिव्याची गाडी त्यांना दिली होती, त्यामुळे निवडून आलेली माणसे त्यांची होती. मात्र, आता ही माणसे त्यांची राहिलेली नाहीत. शिवसेना पुरस्कृत आमदार चंद्रकांत पाटील यांच्या पाठीशी ते गेलेले आहेत. मात्र येत्या पाच ते सहा महिन्यात होणाऱ्या निवडणुकीत आम्ही भारतीय जनता पक्षाचे अस्तित्व दाखवून देणार आहोत.