चंद्रकांत पाटील नेहमी बदलतात; खडसेंनी काढला चिमटा

जळगाव : भाजप नेते चंद्रकांत पाटील (Chandrakant patil) आपल्या मतावर कधीच ठाम राहत नाही. त्यांची मते ही रोज बदलत असतात, अशा शब्दांत राष्ट्रवादी काँग्रेसचे नेते एकनाथ खडसे (Ncp leader eknath khadse) यांनी चिमटा काढला आहे. (jalgaon-political-news-eknath-khadse-statment-chandrakant-patil)

राष्ट्रवादी काँग्रेस पक्षाचा आज वर्धापन दिन साजरा होत आहे. एकनाथ खडसे गुरुवारी सकाळी जळगावात आले असता जिल्हा पक्ष कार्यालयात आयोजित कार्यक्रमाला त्‍यांनी उपस्थिती लावली. यानंतर जळगावातील मुक्ताई निवासस्थानी त्‍यांनी पत्रकारांशी संवाद साधला.

मुख्यमंत्री उद्धव ठाकरे यांनी मराठा आरक्षण प्रश्‍नी दिल्लीत पंतप्रधान नरेंद्र मोदी यांची भेट घेतली. त्यानंतर भाजप नेते चंद्रकांत पाटील यांनी आम्हाला वाघाशी मैत्री करायला आवडेल, असे वक्तव्य केले. या वक्‍तव्‍यावर प्रतिक्रिया देताना खडसे यांनी भाजपचे चंद्रकांत पाटील यांना चिमटा काढत म्हणाले, की चंद्रकांत पाटील हे आपल्‍या मतावर कधीही ठाम नसतात. त्यांची मते दररोज बदलत असतात. आजपर्यंत त्यांनी ठामपणे भूमिका घेतली नसून आता काही सांगतील, नंतर लगेच बदलतील; असा माझा अनुभव राहिला आहे. त्यांना मैत्री करायची असेल तर त्यांनी करावी, त्यांच्याकडे जावे, असे खडसेंनी सांगितले.

राष्ट्रवादी आता तारुण्यात

राष्ट्रवादी कॉंग्रेसने आजवर २२ वर्षांच्या वाटचालीत अनेक चढउतार अनुभवले आहेत. पक्षाच्या वाटचालीवर नजर टाकली; तर सर्वांनी पक्ष विस्तारासाठी परिश्रम घेतले आहेत. परंतु, अजूनही पक्ष महाराष्ट्राच्या कानाकोपऱ्यात पोहचवण्यासाठी प्रयत्न करण्याची गरज आहे. पक्षाची वाटचाल २२ वर्षांची झाली आहे; अर्थात पक्ष आता तारुण्यात आल्‍याचे खडसे म्हणाले.